Хойд Солонгосын нийслэл Пёньян хотод 10 мянган айлын орон сууцны хороолол шинээр сүндэрлэн босчээ. Хвасон дүүргийн орон сууцны барилгууд нь нийслэлд өрнөж буй томоохон бүтээн байгуулалтын ажлын нэг хэсэг юм. Тодруулбал, энэ нь 2021 онд зарлагдсан 50 мянган айлын орон сууцны төслийн нэг хэсэг бөгөөд олон улсаас тусгаарлагдсан авторитар дэглэмтэй улсын иргэдийн амьдралын түвшинг дээшлүүлэх зорилготой.

Хойд Солонгост өндөр байшингууд байдаг боловч эдгээрийг тансаг байдлын бэлгэдэл гэж хэлэхэд хэцүү. Яагаад гэвэл тус барилгуудын тог байнга тасарч, цахилгаан шат нь ажиллахаа больдог. Энэ нь дээд давхарт амьдардаг хүмүүсийн өдөр тутмын амьдралд хүндрэл учруулдаг. Тиймээс өндөр давхрын байруудыг залууст олгох нь элбэг байдаг.

Эдийн засгийн уналт, түүхий эдийн үнийн өсөлт, хүнсний аюулгүй байдлын байнгын хямралтай тэмцэж буй Хойд Солонгосын хувьд орон сууцны хомсдол бол томоохон сорилт. Өмнөд Солонгосын судлаачдын 2021 онд хийсэн судалгаагаар тус улс өрхийнхөө 70-80 хувийг л багтаах хэмжээний орон сууцтай нь тодорхой болжээ.

Удирдагч Ким Жон Ун өнгөрсөн амралтын өдрөөр шинэ хорооллын ажилтай танилцжээ. Ирэх сарын 15-нд тус улс удирдагч агсан Ким Ил Суны төрсөн өдрийг тэмдэглэнэ. Энэхүү баярын арга хэмжээг угтан Хвасон дүүргийн барилгын ажлын гурав дахь үе шатыг дуусгаж байна.

Нийслэл Пёньяны хувьд Зөвлөлтийн үеийн архитектураараа алдартай. Тэгвэл хотыг илүү орчин үежүүлж буй бүтээн байгуулалтын ажлын явцыг тус улсын хэвлэл мэдээллийн хэрэгслүүд "Пёньяны хурд" хэмээн сайрхаж байна. Гэвч тус улсын барилгын материалын чанар болон ажилчдын ур чадвар шинжээчдийн санааг зовоодог.