“News” агентлагийн тусгай сурвалжлагч Б.Батболд Их Британиас мэдээлж байна.

Төрийн гурван өндөрлөг анхны айлчлалаа хаанаас эхлүүлэх нь улс төрийн хувьд чухал асуудал байдаг.  126 гишүүнтэй шинэ парламентын анхны спикер Д.Амарбаясгалан анхны айлчлалаа хөрш орон болох Хятадаас эхлүүлсэн бол хоёр дахь айлчлалаа гуравдагч орон буюу Их Британи, Умард Ирландын нэгдсэн хаант улсад хийж байна. УИХ-ын даргын түвшинд хийж буй анхны энэхүү айлчлалд хоёр улс онцгой анхаарлаа хандуулж буйг тус улсад суугаа Монголын Элчин сайдын яамныхан сонирхуулав.

Монгол-Их Британи хоёр улсын хооронд дипломат харилцаа тогтоод 62 жил болж байна. Хоёр улсын харилцаа ардчиллын нийтлэг үнэт зүйлсийн төлөө нэлээд идэвхжсэн, Монголын ардчилал, парламентын засаглалыг Их Британи улс эхнээсээ дэмжиж ирсэн байдаг.  Их Британи улс 1991 онд болсон “Их долоо”-гийн уулзалтаар ардчиллын замаар алхах сонголтыг хийсэн Монголын дэмжиж, хамтран ажиллахыг бусад G-6-д уриалсан тухай хоёр улсын харилцааны түүхэнд онцлон бичжээ.

Монголын ардчиллыг бэхжүүлэх зорилгоор 1996 онд Их Британийн Гадаад хэрэг, хамтын нөхөрлөлийн сайд Малколм Рифкинд манай улсад айлчилж байсан бол Монголоос  Ерөнхий сайдын хувиар 2007 онд Н.Энхбаяр, 2017 онд Ч.Сайханбилэг нар тус улсад айлчлал хийж байжээ.

УИХ-ын дарга Д.Амарбаясгалангийн Их Британи, Умард Ирландын нэгдсэн хаант улсад хийж буй анхны айлчлалыг УИХ-ын цөөнгүй гишүүн дагалдаж яваа юм.  Тус улсад Монголын 6000 гаруй иргэн ажиллаж, амьдардаг гэсэн албан бус тоо бий. Үүнээс 5000 мянга нь тус улсад суралцдаг юм байна.

Монголын цагаар 2025 оны гуравдугаар сарын 19-нд УИХ-ын дарга Д.Амарбаясгалан Парламентын нийтийн танхимын дарга Эрхэмсэг ноён Л.Хойлтой Уэстминстерийн ордонд албан ёсны уулзалт хийсэн юм. УИХ-ын дарга Д.Амарбаясгалан шинээр байгуулагдсан Улсын Их Хурлын тавьж буй зорилт, парламентын засаглалыг бэхжүүлэх чиглэлээр хэрэгжүүлж буй “Гурван төгөлдөршил” бодлого болон Монгол Улсын эдийн засгийг хөгжүүлэх, худалдаа, хөрөнгө оруулалтыг нэмэгдүүлэхэд зорилгоор хэрэгжүүлж буй үйл ажиллагаа, эрх зүйн орчны шинэчлэлийн талаар танилцууллаа.

Мөн энэ өдөр УИХ-ын дарга Д.Амарбаясгалан Их Британийн технологийн компаниудад ажиллаж буй монгол залуустай уулзаж, дэлхийд тэргүүлэгч технологийн компаниудад ажиллаж буй тэдний туршлага, мэдлэг улс орны хөгжлийг түүчээлэхэд чухал ач холбогдолтойг онцлов.

Монгол Улс үндэсний хиймэл дагуулыг бүтээх, технологийн хөгжилд хөрөнгө оруулахад багагүй анхаарч буй юм.

Их Британи нь Монголын худалдааны 10 гол түншийн нэг. Тус улсаас Монгол оруулсан хөрөнгө оруулалтын хэмжээ /өнгөрсөн 2024 оны байдлаар/ 700 сая орчим ам.долларт хүрсэн байна. Харин гадаад худалдаа 70 орчим сая ам.доллараар хэмжигдэж байна. Их Британитай худалдаа, хөрөнгө оруулалтын харилцаагаа өргөжүүлэх нь Монгол Улсын эдийн засгийг цаашид хөгжүүлэх тэргүүлэх чиглэлийн нэг аж.

Лондон нь дэлхийн хамгийн супер метроны системтэй хотын нэг. 1863 онд анхны  метроны сүлжээгээ барьсан байдаг. Өдөрт дөрвөн сая хүн Лондоны метрогоор үйлчлүүлдэг гэсэн албан бус статистик уншсан.

Улаанбаатар хотын түгжрэлийг бууруулах зорилтын хүрээнд Их Британийн Сангийн яамнаас Монголын Засгийн газарт гурван тэрбум фунт стерлингтэй тэнцэх баталгааг 15 жилийн хугацаатай гаргаж, метроны төслийг санхүүжүүлэхээр болсон тухай өнгөрсөн оны намар Нийслэлийн Засаг дарга Х.Нямбаатар хэвлэлийнхэнд мэдээлсэн билээ. Мөн Лондон хотын метроны Элизабет шугамыг амжилттай барьж ашиглалтад оруулсан Cross Rail Int. -тай Улаанбаатар метро төсөл дээр хамтран ажиллах санамж бичиг байгуулсан бий.