Дональд Трамп, Зеленский нар Украинд гал зогсоох хэлэлцээрийн хүрээнд Лхагва гаригт утсаар ярьсан билээ. Энэ үеэр АНУ Украины аюулгүй байдлыг хангахын тулд цахилгаан станцуудыг нь хяналтдаа авах боломжтой гэсэн санал гаргажээ. Цахилгаан эрчим хүчний чиглэлээр мэргэшсэн АНУ-ын туршлага Украинд маш их тус болно гэж Трамп хэлжээ. АНУ-ын Төрийн нарийн бичгийн дарга Марко Рубио, Үндэсний аюулгүй байдлын зөвлөх Майк Уолтз нар энэ саналыг гайхалтай гэж тодорхойлсон аж.

Европын хамгийн том цахилгаан станцыг дахин ашиглалтад оруулахад хоёр жилээс илүү хугацаа шаардагдана. Тус цахилгаан станц нь Украин болон Европын хувьд амин чухал гэдгийг Зеленский хүлээн зөвшөөрсөн юм.

Мөн эрчим хүчний дэд бүтэц, төмөр зам, боомтын байгууламжид цохилт өгөхийг зогсоож болох ч ОХУ гал зогсоох нөхцөлийг зөрчсөн тохиолдолд хариу арга хэмжээ авна гэв. "ОХУ-тай тохиролцох хүртэл, хэсэгчлэн гал зогсоох холбогдох баримт бичиг гарах хүртэл нисгэгчгүй онгоц, пуужингууд нисэлдсээр л байх болно гэж би ойлгож байна" гэж тэр хэлжээ.

Трамптай утсаар ярихаасаа өмнө Зеленский Путины амлалт бодит байдалтай маш их зөрчилдөж байна гэж мэдэгдсэн билээ. Яагаад гэвэл Путин Трамптай ярилцсаны дөнгөж дараахан нэг шөнийн дотор 150 нисгэгчгүй нисэх онгоцоор Украины нутаг дэвсгэрт цохилт өгсөн. Эдгээрийн зарим нь эрчим хүчний байгууламжууд руу чиглэсэн байв. Халдлагыг няцаах оролдлого хийсэн ч хоёр эмнэлэг, төмөр зам, 20 гаруй байшин зэрэг иргэний дэд бүтэц цохилтод өртжээ. Киев, Житомир, Сумы, Чернигов, Полтава, Харьков, Кировоград, Днепропетровск, Черкасск мужуудад Оросын нисгэгчгүй онгоц илэрсэн байна.

Зеленский Трамптай хийсэн дуудлагаа эерэг, илэн далангүй, бодитой болсон гэж тодорхойлжээ. Тэрбээр "Х" хаягаараа "АНУ-тай, ерөнхийлөгч Трамптай хамт, АНУ-ын удирдлага дор бид энэ жил тогтвортой энх тайванд хүрнэ гэдэгт итгэж байна" гэжээ.

АНУ-ын Төрийн нарийн бичгийн дарга Марко Рубиогийн хэлснээр талууд ойрын өдрүүдэд Саудын Арабт уулзаж, гал зогсоох хэлэлцээрийг Хар тэнгис хүртэл өргөжүүлэх талаар ярилцах аж. Энэ нь дайныг бүрэн зогсоох эхний алхам болно гэдэгт тэд найдаж байна.