АНУ-ын ерөнхийлөгч Дональд Трамп ОХУ-ын ерөнхийлөгч Путинтэй Мягмар гаригт утсаар ярьсан билээ. Хоёр цаг орчим утсаар ярисны үр дүнд Путин Украины эрчим хүчний байгууламжуудад цохилт өгөхгүй гэж амласан боловч гал зогсоох хэлэлцээрийг хүлээн зөвшөөрөөгүй.

Тэгвэл Трамптай утсаар ярьсан дараагийн хүн Украины ерөнхийлөгч Зеленский байлаа. Тэд Лхагва гаригт цаг орчим утсаар ярьсан бөгөөд Трамп энэ дуудлагыг "үр дүнтэй болсон" гэж хэлжээ. Тэрбээр "Truth social" хаягаараа "Хэлэлцүүлгийн ихэнх сэдэв нь Орос, Украины хэн хэнийх нь хүсэл, шаардлагад нийцүүлэхийн тулд Путинтэй өчигдөрхөн ярьсан зүйлс дээр үндэслэсэн байсан. Бид нэлээн ахиц сайтай байна. Хэлэлцсэн асуудлын талаар үнэн зөв тайлбар өгөхийг Төрийн нарийн бичгийн дарга Марко Рубио, Үндэсний аюулгүй байдлын зөвлөх Майк Уолтз нараас хүссэн байгаа. Илүү нарийн мэдээлэл удахгүй гарна" гэж жиргэжээ.

Дашрамд дурдахад, Трампийн ярианы өнгө аяс өнгөрсөн сард Цагаан ордонд болсон ширүүхэн уулзалтын үеийнхийг бодвол эерэг, зөөлөн байсныг "NY Times" хэвлэл онцлов.

Тэднийг утсаар ярих хооронд ОХУ-ын арми Днепр дэх Украины төмөр замын байгууламж руу халджээ. Халдлагын улмаас дөрвөн ажилчин шархадсаны хоёрынх нь бие хүнд байна гэлээ.

Трамп, Зеленский нар Улаанбаатарын цагаар Лхагва гаригийн 23:45 цагийн орчимд утсаар ярьж дууссан. Тэдний ярилцаж хэлэлцсэн зүйлсийн талаарх дэлгэрэнгүй мэдээллийг Цагаан ордны хэвлэлийн төлөөлөгч Кэролин Левитт өгнө. Дэлгэрэнгүй мэдээллийг бид эргэн хүргэх болно.