Санхүүгийн зохицуулах хороо /СЗХ/ нь хэрэглээний зээлийн өр зээлийн харьцаагаа 40:60 болгон чангаруулжээ.

Төв банк нь саяхан Мөнгөний бодлогын шийдвэрийн хүрээнд хэрэглээний зээлийн өр зээлийн харьцааг 50:50 болгож чангаруулж байгаагаа мэдэгдсэн. Тэгвэл дээрх шийдвэртэй уялдуулан СЗХ нь банк бус санхүүгийн байгууллага болон бусад зөвшөөрөл авдаг байгууллагуудын зээл олгох журмыг чангаруулж,  40:60 харьцааг мөрдөхөөр болгож, зохицуулалт хийжээ.  Энэхүү арга хэмжээ нь импортоор орж ирэх автомашины тоог хязгаарлах, валют гадагшаа урсахаас сэргийлэх арга хэмжээтэй холбогдож буй аж.

Учир нь, Монгол Улсад өнгөрсөн жил 120 мянган суудлын тэрэг импортоор орж ирсэн гэх мэдээллийг албаныхан өгсөн. Тэр хэрээр валют гадагшилсан.

Дэлхий дахинд тарифын дайнаас үүдэлтэй эдийн засгийн шок үүсэж эхэлсэн бөгөөд энэ нь урт хугацааны эдийн засгийн хямрал үүсгэж болзошгүй болсон.  Тухайлбал, нүүрсний үнэ унасан нь Монгол Улсын экспортын орлогод нөлөөлж эхлээд байгаа. Ийм үед валют гадагшлах нь төгрөгийн ханш сулрах эрсдэлтэй. Тиймээс дээрх арга хэмжээ нь импортыг хязгаарлах бодлогын арга хэмжээний нэг гэж Засгийн газар ч үзэж буй аж.

Банк бус санхүүгийн байгууллагуудын мөрдөж эхэлж буй дээрх журам автомашины ченжүүдэд хүндээр тусч байгааг сануулах хүмүүс ч олон бий. Учир нь, энэ оны нэгдүгээр сарын 1-нээс эхлэн СЗХ-ноос гаргасан журмын дагуу ББСБ нь 30:70 харьцаагаар автомашины зээл олгож эхэлснээр худалдан авалт өмнөх оны мөн үеийнхээс 30 хувиар буурсан байдаг. Тодруулж хэлбэл, иргэн автомашин авахын тулд 30 хувийн урьдчилгаа төлж байсан. Харин одоо 40:60 харьцааг мөрдөж эхэлснээр худалдан авах автомашиныхаа үнийн дүнгийн 40 хувийг урьдчилан төлөх шаардлага тавигдаж буй юм.

Г.ХОРОЛ