Байгал орчин, уур амсгалын өөрчлөлтийн яамны Төрийн нарийн бичгийн дарга Э.Баттулгыг өнөөдрийн /2025.03.19/ Засгийн газрын хуралдаанаар Цаг уур, орчны шинжилгээний газрын даргаар томилжээ. Түүнд Байгаль орчин, уур амьсгалын өөрчлөлтийн сайд С.Одонтуяа энэхүү шийдвэрийг танилцуулж, тамгыг гардуулан өгсөн байна.

Тэрбээр Засгийн газрын шийдвэрээр 2022 оны нэгдүгээр сарын 19-нд Байгаль орчин аялал жуулчлалын яамны Төрийн нарийн бичгийн даргаар томилогдсон ч жилийн дараа буюу 2023 оны гуравдугаар сард сайдтайгаа хамтарч ажиллаж чадаагүй үндэслэлээр чөлөөлөгдөж байсан юм.

Э.Баттулга нь МУБИС-ийн Байгалийн ухааны факультетыг газар зүйн багш, аялал жуулчлалын менежер мэргэжлээр төгссөн. 2002 оноос Засгийн газрын хэрэгжүүлэгч агентлаг Аялал жуулчлалын газарт мэргэжилтэн, 2004-2006 онд Зам, тээвэр, аялал жуулчлалын яаманд мэргэжилтэн, 2006-2008 онд тус яаманд газрын орлогч дарга, газрын дарга, 2008-2011 онд Байгаль орчин, аялал жуулчлалын яаманд газрын орлогч дарга, газрын даргаар ажилласан.

Мөн 2013-2016 онд Нийслэлийн Засаг даргын хэрэгжүүлэгч агентлаг Аялал жуулчлалын газрын даргаар, 2016-2020 онд Нийслэлийн Засаг даргын хэрэгжүүлэгч агентлаг Байгаль орчны газрын даргаар ажилласан бөгөөд 2020 оноос УИХ-ын Тамгын газрын дэд даргаар ажиллаж байгаад Байгаль орчин аялал жуулчлалын яамны Төрийн нарийн бичгийн даргаар томилогдсон ч чөлөөлөгдсөн байдаг.