ОХУ Крымийг хууль бусаар эзлэн авсны дараа Севастополийн захирагчаар томилогдсон Дмитрий Овсьянников Их Британийн хориг арга хэмжээг зөрчсөн хэргээр шүүхэд дуудагджээ. Тэрбээр эхнэр Екатерина Овсьянниковагаас 75 мянган фунт стерлинг, ах Алексей Овсьянниковоос цоо шинэ Мерседес Бенз машин авсан аж. Тэднийг гурвууланг нь хориг арга хэмжээг зөрчсөн 10, мөнгө угаасан хоёр хэрэгт холбон буруутгажээ. Гэхдээ хэн хэн нь буруутай гэдгээ үгүйсгэж байна.

Дмитрий Овсьянников нь Крымд гурван жилийн турш ахлах албан тушаал хашсан. Мөн ОХУ-ын Аж үйлдвэр, худалдааны дэд сайдаар ажиллаж байсан туршлагатай нэгэн. 2014 онд ОХУ Крымийг эзэлсний дараа Путин түүнийг стратегийн ач холбогдолтой Севастополь боомт хотын захирагчийн үүрэг гүйцэтгэгчээр томилсон. Улмаар 2017 оны сонгуульд ялснаар тэр албан ёсоор захирагч болжээ.

Хожим нь 2019 оны долдугаар сард Овсьянников албан тушаалаасаа огцорсон ч ОХУ-ын улс төрийн нэгэн чухал дүр хэвээр байна.

Дмитрий Овсьянников хэрхэн хориг зөрчсөнийг дэлгэрүүлбэл, тэрбээр 2022 оны наймдугаар сард Их Британиас иргэншил хүсчээ. Их Британийн хориг арга хэмжээ хэвээр байгаа ч тангарагтны шүүх түүнд 2023 оны нэгдүгээр сард иргэншил олгосон аж. Түүний аав нь Их Британид төрсөн тул ийм давуу эрх эдэлжээ. Дараа сард нь Овсянников Их Британид ирж, Галифаксын банкинд данс нээлгэх хүсэлт гаргасан. Энэ данс руу нь түүний эхнэр 76 мянган фунт стерлинг шилжүүлснээр Мерседес Бенз машин авах барьцаа байршуулах боломжтой болжээ. Гэвч хожим банк түүнийг Их Британийн хоригийн жагсаалтад байгааг мэдээд дансыг нь царцаасан байна.