Эрх чөлөө төрийн бус байгууллагаас өнөөдөр /2025.03.19/ мэдээлэл хийлээ.

Эрх чөлөөний модул цамхаг НҮТББ-ын тэргүүн Ц.Чинбат:

-Засгийн газар бодлого ярихаа больсон, хүүхэнтэй кофе уух тухай ярьдаг болсон. Шүлэг бичиж  ном хэвлүүлэх тухай ярьдаг болсон. Улсаараа нэг дайсантай болсон, тэр нь Ц.Элбэгдорж. Монгол Улсын Засгийн газар хөгжлийн гарцын тухай, төсвийн тухай, ард иргэдээ хэрхэн аюулгүй орчинд амьдруулах тухай ярьдаг тэр цаг хугацаа 10 жилийн өмнө булшлагдах шиг боллоо. Одоо 14 мега төсөл гээд ярьж байна, зүгээр л яриа. Улсын төсөв дээрээ тавиад ТЭЗҮ хийсэн хэчнээн төсөл байгаа билээ. Аж үйлдвэрийн паркийн ТЭЗҮ байна.  Улсын төсвөөр өчнөөн мөнгө тавиулаад хэдэн маккеттай л үлдсэн. 1.3 их наяд төгрөгийг Л.Оюун-Эрдэнэ болон түүний багийнхан хувааж идэх тухай л ярьж байна.

14 мега төслийн хүрээнд Гашуунсухайт-Ганцмод төмөр замын хил холболтын тухай ярьж байна. Тэр холболтынхоо өрөнд монголчууд Тавантолгойнхоо хоёр толгойг үнэгүй өгч байна. Энэ нь Х.Баттулгын өрийг дарж өгч байгаа, ийм юм хийж байгаа Засгийн газар. Улс орныхоо эрх ашгийн төлөө нэг ч үйлдэл юу ч хийсэнгүй. Монголчуудыг хагалган бутаргах үйл ажиллагааг Л.Оюун-Эрдэнийн өөрийнх нь 50 хувь эзэмшдэг “Херо энтертайнмэнт” хийдэг.

Монгол Улсын Засгийн газар нь иргэдээ баян, ядуугаар нь хувааж ангич нийгмийн үзэл санааг дэлгэрүүлж байгаа. Нэг дайсан гаргаж ирж, цовдолж байгаа хэлбэр нь цэвэр Кремлийн хийдэг технологи.

Бид энэ түүхийг мэдэрч байгаа. 1929 оноос хойш өмч хураах комисс байгуулагдаад монголчуудыг Японы тагнуул, Пэлжид Гэлэнгийн хэрэг гэхчлэн нэр хоч зүүж, нэгнийгээ хөнөөж байсан гашуун сургамж түүхэнд бий. Энэ үүд хаалга руу Л.Оюун-Эрдэнэ өнөөдөр иргэдээ  хөтлөөд орж байна. Ангийн дайсан бий болгож байгаа хэлбэр. Эрх чөлөөг авч ирсэн, эрх чөлөөний туг сүлд нь болж манлайлж явж байсан Ц.Элбэгдорж, Д.Сосорбарам, Д.Ганболд тэргүүтэй хүмүүсийг дайсан болгож иргэдэд үзүүлж байгаа хэлбэр нь их хядлагын эхлэл. Их хядлага ингэж эхэлсэн.

Монголчуудыг би сэрээсэй гэж хүсэж байна. Үндсэн хуулийн эсрэг Засгийн газар байгуулагдсан. Үндсэн хуулинд тодорхой заачихсан байгаа. Олонхи нь засаглаж, цөөнх нь сөрөг хүчин байна гэж заасан.

Монголчуудыг Тува, Буриадаас ядуу гуйлгачин амьдруулах гэсэн Кремлийн төсөл  явж байна.

Нийгмийн сул дорой амьтдыг ашигладаг. Х.Баттулга шиг шуналтай, мэдлэг боловсролгүй харанхуй хүмүүсийг ашигладаг. Энэ бол түүх.

Ингэж ашиглаж биднээр тоглож, монголчуудыг хооронд нь талцуулж, ангийн дайсан бий болгож байна. Энэ бүх зүйлийг мэдсээр харсаар байж зүгээр хараад сууж чадахгүй.

УИХ дээр Улсын дээд шүүхийн шийдвэрийг хэлэлцүүлэх гэж байна. Хаврын чуулган нээсэн өдөр УИХ-ын гишүүн Л.Мөнхбаясгалангийн мэдээллийг сонссон байх. Дээд шүүхийн шийдвэрийг УИХ-ын тогтоолоор хүчингүй болгуулах гээд явж байна. Энэ бол эрх мэдлийг нэг гарт авах гэсэн санаа мөн. Муу ч сайн ч Монгол Улс засаглалын хувьд балансаа бариад явж байсан. Өнөөдөр тэр балансыг устгах гээд дайрч байна, улайрч байна. Үхэн хатан улаарч, сандал ширээтэйгээ зууралдаж байгаа байдал нь Монгол Улс дарангуйллын систем рүү явж байгаа гэдэгт огт эргэлзэх хэрэггүй болсон. Ноорогийн залуусыг уржигдар баривчилсан үйл явдал энэний тод гэрч болж байгаа нь үнэн .

Монголд хууль ёсны юм гэж байхгүй болсон. Хуулийг уландаа гишгэдэг дарга ангид үйлчилдэг цагдаатай боллсон.

Хууль дэвсэлдэг, дарга ангид үйлчилдэг төрийн албан хаагчидтай болсон. Л.Оюун-Эрдэнэ гэдэг хүнд таалагдахгүй бол бүх юмыг дэвсэлдэг цагдаа, хууль хяналтын байгууллагатай болсон. Монгол Улсад дарангуйлал бодитоор тогтож эхэлсэн. Энийг бий болгоход гол үүрэг гүйцэтгэсэн хүн бол Л.Гантөмөр. Монголын эрх чөлөөг гараараа устгаж байгаа хүмүүсийн нэг бол яах аргагүй мөн. Х.Баттулга, Л.Оюун-Эрдэнэ гэдэг хүний хавханд орсон. Өдрөөс өдөрт монголчуудын амьдралыг сүйтгэж байна, өдрөөс өдөрт монголчуудын амьдралын чанар муудаж, худалдан авалт буурсан нь Ц.Элбэгдорж гэдэг хүнээс болоогүй. 2024 оны сонгуулийн үр дүнд хяналт тавь гээд байхад Л.Оюун-Эрдэнийн гутлын шалны алчуур болгон тавьж байгаа Ардчилсан намын арчаагүй байдалтай холбоотой.

Тийм учраас Эрх чөлөө төвийнхөн Ардчилсан намын бүлэгт,  Ардчилсан намын Улс төрийн зөвлөлд шаардлага хүргүүлж байгаа. Засгийн газрыг огцруулахад манлайлан оролцохыг уриалж байна.

Өнгөрсөн хоёрдугаар сарын 12-27-ныг дуустал бид иргэдээс Засгийн газрыг огцруулах асуудлаар гарын үсэг цуглуулсан. Ард иргэд маань Засгийн газарт дургүй байна, 100 мянга гаруй иргэн дэмжиж гарын үсэг зурсан.

Ирэх дөрөвдүгээр сарын 27-нд Эрх чөлөө төвөөс Засгийн газрыг огцруулахын төлөө тууштай тэмцэнэ. Монголд дарангуйлал, бурангуй ёс тогтохыг хүлээн зөвшөөрч чадахгүй учраас тэмцэнэ гэлээ.