УИХ-ын гишүүн Д.Цогтбаатарыг Хөгжлийн банкны хэргээр ял шийтгэсэн анхан шатны шүүхийн шийдвэрийг Дээд шүүх хэвээр үлдээсэн. Түүний хувьд хяналтын шатны шүүхийн гэм буруутайд тооцсон тогтоолыг өөрийн биеэр гардан аваад байгаа. Ингэснээр УИХ-ын гишүүний бүрэн эрхийн асуудал хөндөгдөж байгаа. УИХ-ын Төрийн байгуулалтын байнгын хорооноос өчигдөр /2025.03.18/ УИХ-ын гишүүн Д.Цогтбаатарын асуудлаар Улсын дээд шүүх рүү албан бичиг явуулсан талаар мэдээлсэн. Дээд шүүхээс хариу ирсний дараа Төрийн байгуулалтын байнгын хорооноос тус асуудлыг УИХ-д танилцуулах аж.

Шүүхийн шийдвэр хэрэгжихгүй яагаад олон сар болж байгаа талаар Шүүхийн ерөнхий зөвлөлөөс өгч байгаа мэдээллээр, шүүхийн шийдвэрийг хэрэгжүүлэхэд хуулийн ямар зохицуулалт маргаантай байгааг бид хариулах боломжгүй. Агуулгаараа бол шүүхийн шийдвэр заавал биелэгдэх ёстой гэсэн хуулийн заалт бий гэв.

Харин энэ талаар Төрийн байгуулалтын байнгын хорооны дарга Ж.Бат-Эрдэнэ хэлэхдээ, Хуульд порцедур бүрэн заагдаагүй. Тухайлбал, УИХ-ын гишүүнтэй холбоотой шийдвэр гарсан бол үүнийг Дээд шүүх УИХ руу явуулна гэсэн заалт байхгүй. УИХ шийдвэрийг татаж авна гэсэн заалт ч байхгүй. Тиймээс Төрийн байгуулалтын байнгын хорооны даргын хувьд энэ асуудлаар Улсын дээд шүүх рүү албан бичиг явуулсан. Хариу ирсний дараа манай байнгын хороо хуралдах эрхтэй болно. Хуралдахдаа мэдээж шүүхийн шийдвэрийг хэлэлцэхгүй, танилцуулна гэсэн юм.

УИХ-ын гишүүнийг эргүүлэн татах эсэх асуудлаар Ёс зүйн байнгын хорооны дарга Б.Баярбаатар мөн энэ долоо хоногт мэдээлэл өгсөн. Түүний хувьд Дээд шүүхийн гаргасан шийдвэрийг УИХ хэлэлцэх эрх байхгүй. Хуулиар бидэнд ийм эрх олгогдоогүй. Өнөөдөр эрхзүйт төрийн гурван салбарын нэг нь шүүх засаглал. Шүүх засаглал нь өөрөө хараат бусаар ажиллах ёстой.

Эрхзүйн гаргалгааны хувьд Улсын дээд шүүх шийдвэрийг албажуулж ирүүлэх үүргийг хүлээхгүй. Д.Цогтбаатар гишүүн тогтоолоо гардаж авсан гэдэг нь иргэн хүний асуудал.

УИХ тэр шийдвэрийг хэрхэх эрхзүйн зохицуулалт байхгүй. Үндсэн хуулийн 29 дүгээр зүйл дээр УИХ-ын гишүүн гэмт хэрэг үйлдсэн нь шүүхээр эцэслэн тогтоогдсон бол эргүүлэн татна гэсэн заалт байдаг гэдгийг онцолсон юм.