Украины нийслэл Киев хотын Гэгээн Эндрюгийн сүмийн ойролцоох зах аялагчдын дунд алдартай. Тус зах дээр уламжлалт хувцас, гар урлал, уран зураг зэргийг ихэвчлэн зардаг боловч өнгөрсөн Ням гаригаас эхлэн цэргийн сэдэвтэй дурсгалын зүйлс зардаг нэгэн лангуу нээгджээ. Цэргийн янз бүрийн ангийг төлөөлсөн өнгө өнгийг тэмдгийг энд зарж байна.

Ази аялагчдыг хармагцаа худалдагч нь хойд солонгос цэргүүдийн тэмдгийг сонирхуулах аж. Худалдагчийн хэлснээр тэдгээрийг Оросын баруун бүс болох Курск мужаас авчирчээ. Тэрбээр долоо хоногт хоёроос гурван удаа Курск мужид үйл ажиллагаа эрхэлдэг брокеруудаас тэмдэг хүлээн авдаг ба одоогоор 15 ширхэгийг зараад байна.

Хойд солонгос цэргүүдийн зүүж байсан тэмдэг украин цэргүүдийнхээс 10 дахин өндөр үнэтэй буюу 70 мянган воноор үнэлэгдэнэ. Гэсэн ч эрэлт нь өндөр байгаа аж. Яагаад гэвэл украин цэргийн тэмдгийг худалдааны зорилгоор олноор үйлдвэрлэсэн байдаг бол хойд солонгос цэргүүдийнх үнэхээр байлдааны талбараас ирсэн, бодит хүн зүүж байсан гэдгээрээ онцлог.

Дүрэмт хувцасны тэмдэгээс гадна хойд солонгос цэргүүдийн авч явсан тугийг тус зах дээр зарж байна. Энэ нь Хойд Солонгос, Оросын далбааг хослуулсан загвартайгаараа онцлог. Мөн л Курскийн фронтоос авчирсан гэх энэ туг 140 мянган воноор зарагдаж байна. Эдгээр эд зүйлийг зараад олсон орлогын тодорхой хэсгийг Украины армид зориулж байна.

Хойд Солонгосоос гадна орос цэргийн үнэмлэх зэрэг зүйл ч энд зарагдаж байгаа ажээ.