Цахим хуудаст хэвлэл мэдээллийн байгууллагын үйл ажиллагаа явуулах эрх чөлөөнд халдаж, хойшлуулшгүй ажиллагааны дагуу оффисынх нь эд зүйлийг хураан авч, хуулийн байгууллага шөнөжин мэдүүлэг авч залхаан цээрлүүлсэн гэх мэдээлэл гараад байна. Тодруулбал, цахим хуудаст контент бүтээдэг "Ноорог" медиа агентлагийн залуусыг цагдаагийн байгууллагаас баривчилж, саатуулсан гэх мэдээлэл гарчээ.

Энэ талаар цагдаагийн байгууллагаас тодруулахад, "Ноорог" медиагийнхныг саатуулж, мэдүүлэг авсан. Баривчилж, цагдан хорьсон гэх мэдээлэл ташаа. Мөрдөн шалгах ажиллагаа үргэлжилж байгаа гэлээ.

Хэвлэн нийтлэх эрх чөлөөг хязгаарласан гэх асуудлаар цахим хуудаст олны танил хүмүүс болон чөлөөт хэвлэлийг дэмждэг олон төрийн бус байгууллагууд нэгдэж мэдэгдэл гаргаад байгаа юм.

"Ноорог" медиагийн зүгээс одоогоор ямар нэгэн тайлбар өгөөгүй бөгөөд, албан оффист нь нэгжлэг хийж, компьютер, хард тоног төхөөрөмж болон ажилтнуудын гар утсыг хураан авсан. Өмгөөлөгчгүй мэдүүлэг өгөхөөс татгалзсан найман ажилтныг шөнийн 22:00 цагаас 07:00 цаг хүртэл саатуулсан гэдгийг өмгөөлөгчид нь мэдээлээд байна. Өнөөдөр 12:30 цагаас "Ноорог" медиа агентлагаас хэвлэлийн хурал хийнэ гэдгээ зарлаад байгаа юм.

Эрүүгийн цагдаагийн албаны Кибер гэмт хэрэгтэй тэмцэх хэлтсээс “цахим орчинд Ноорог гэх нэртэй фейсбүүк пейж хаягаас бусдын нэр хүндэд халдаж худал мэдээлэл тараасан” гэх гэмт хэргийн талаарх мэдээлэлд мөрдөн шалгах ажиллагаа явуулж байна. Мөрдөгчөөс нэр бүхий иргэдийг шүүхийн зөвшөөрөлгүй баривчлах санал гарган ирүүлснийг прокурор танилцаад хуульд заасан баривчлах үндэслэл тогтоогдоогүй гэж үзэн, сэжигтнийг хойшлуулшгүйгээр баривчлахаас татгалзаж шийдвэрлэсэн байна.