Харбины Азийн өвлийн наадамд Монголын уран гулгалтын тамирчид оролцож, эх орныхоо нэрийг мөсөн дэвжээнээ тахалсан. Уран гулгагч Г.Марал-Эрдэнэ, О.Мишээл нар мөс хагалж, тал нутгийн охин цойлох мөч удахгүйг харуулсан нь лавтай. Тэгвэл тэдний үргэлжлэл болсон Элли гэх өөр нэгэн монгол охин алс холын будант Альбионд бэлтгэгдэж байна. Өдгөө 11 настай, монгол ээж, англи аавтай охины тухайд уран гулгалтын спортоор таван настайгаасаа эхлэн хичээллэж, шаггүй амжилтын эзэн болжээ.

Их Британи бол уран гулгалтын спортын өнө эртний түүхтэй гүрнүүдийн нэг. Тэд 1908 оноос хойш өдийг хүртэл өвлийн олимпоос 13 медаль хүртжээ. Мэдээж хамгийн алдартай тамирчид нь Жэйн Торвилл болон Кристофер Дин гэх хос билээ. Бүжгийн төрөлд гайхалтай байсан хослол хамтдаа дэлхий, Европын аваргаар тус бүр дөрвөн удаа тодорч, 1984 оны Сараевогийн олимпоос алт, 1994 оны Лиллехаммер олимпоос хүрэл медаль хүртсэн түүхтэй.

Элли охин Өмнөд Йоркширийн Шеффилд хотод аав, ээж, дүүгийн хамтаар аж төрдөг. Зургадугаар ангийн сурагч тэрбээр таван настайгаасаа эхлэн уран гулгалтын спортоор хичээллэж эхэлсэн боловч цар тахлын улмаас хоёр жил завсарджээ. Харин долоон настайгаасаа эхлэн тууштай хичээллэж эхэлсэн гэнэ.

Анх уран гулгалтын спортоор хичээллэж эхэлсэн талаараа Элли ярихдаа "Ээж минь багадаа Оросын уран гулгалтын тамирчид, тэмцээнийг телевизороор үзэх их дуртай байсан гэсэн. Нэг өдөр намайг Шеффилд хотын мөсөн каток руу дагуулж явсан юм. Тэр өдөр л би анх удаагаа тэшүүр өмсч, гулгаж үзсэн дээ" гэв.

Шеффилд хот ч Британи даяар тэшүүрийн спортоороо алдартай. Үүнийгээ ч олон зүйлээрээ харуулдаг. Тус хотод Британийн хамгийн алдартай мөсөн өргөөнүүдийн нэг байдаг гэхэд хилсдэхгүй. Европ, дэлхийн олон ч томоохон тэмцээнийг тус өргөөнд хүлээн авдаг. Сүүлд гарсан мэдээллээр уран гулгалтын 2026 оны Европын аварга Шеффилд хотын "iceSheffield" мөсөн өргөөнд болох аж.

Элли үргэлжлүүлэн "Үлгэр дуурайлал авдаг хүн гэвэл Шеффилд хотынхоо зул сарын шоуг үзээд элит уран гулгагчдыг хараад маш их сэтгэл хөдөлж байсан. Яг л тэд нар шиг мөсөн дээр эргэлдэхийг хүссэн" гэж ярилаа. Түүний амжилтын эхлэл нь Британийн "Ирээдүйн од" уран гулгалтын тэмцээний алт, хүрэл медаль аж. Мөн Шеффилд хотынхоо уран гулгалтын клубын тэмцээнд олон удаа тэргүүн байр эзэлсэн амжилттай.

Эллигийн оролцсон хамгийн том тэмцээн нь Их Британийн аварга шалгаруулах тэмцээн гэнэ. Түүний хувьд тэмцээний өмнөх сорилгодоо амжилттай оролцож, улсын аваргад оролцох эрхээ авчээ. Энэ талаараа тэрбээр "Тухайн үедээ маш их баярлаж байсан. Учир нь Британийн шилдэг тамирчидтай хамт нэг талбай дээр өрсөлдөх боломж гарсан юм. Энэ үе л намайг хамгийн ихээр сорьж, хүч хөдөлмөр, тэсвэр тэсвэрийг минь шалгасан даа" гэлээ.

Түүний эмээ, өвөө Монголоос ирж, зээ охиноо дэмжиж, тэмцээнийг нь үзсэн нь хамгийн дурсамжтай үе нь ажээ. Элли "Намайг өдий зэрэгт хүргэсэн уран гулгалтын багш нар болон аав, ээж, өвөө, эмээ, найз нартаа баярлаж явдаг" гэв. Түүний дүү зургаан настай хэдий ч дөрвөн настайгаасаа эхлэн уран гулгалтын спортоор хичээллэж эхэлжээ. Дүү нь их сэргэлэн цовоо бас мөсөн дээр гарахаараа улам цоглог болчихдог гэнэ. Элли дүүдээ үлгэр дуурайлал болохыг хичээдэг тухайгаа ярьсан юм.