Тийм ээ, Ардчилсан намд стресс тест хийе. Гишүүдийг нь мормон шашинтнуудын адил хос, хосоор нь явуулж, нэг нэгнийгээ хянадаг болгоё. Ингэхгүй бол Ардчилсан нам мөхлөө. “Ерэн оны ардчилсан хувьсгалыг бид хийсэн юм” гэж бардамнах эрх тэдэнд үгүй болох нь. Ер нь ардчиллын үнэт зарчим Ардчилсан намд байна уу, үгүй юү гэдгийг стресс тестээр шалгах нь зүйн хэрэг болжээ. Тус намд фракциуд байна уу, байна. Гишүүдэд нь амбиц бий юү, бий. Тэгээд… Тэдний чухам хэн нь барууны үзэл баримтлалтай улстөрчид юм бэ. Ардчилсан хүчний холбооныхон нь Н.Алтанхуяг тэргүүтэй “Алтан­гадас”-ынхнаа “МАХН-д дагаар орсон муу коммунистууд” гэх. Харин “Алтангадас”-ынхан нь З.Энхболд нарыг “Муусайн соцдекүүд бид­ний суудлыг булааж авчихаад Та­вантолгойг ухах гэж байгаа юм” гэцгээнэ. Ингэхэд ер нь Ардчилсан намд эзэн байна уу. Ашиг сонирхлын далайд хөл алдсан тэднийг аврах арга одоохондоо алга.

Тэгээд ч намын дарга, генсек хоёр нь өөр, өөр тийш хараад суучихсан байхад тийм гарц яаж байх юм бэ. Тиймээс тус намынхан стресс тестийг ам­жилттай давахгүй нь тодорхой.  

Ардчилсан намын Ерөнхий на­рийн бичгийн дарга Д.Эрдэнэбат “Бус­дын шидсэн чулууг өөдөөс нь шидмээргүй байна” гэх юм. На­мынхаа гишүүдийг нэгтгэн зангидах үүрэгтэй түүний хувьд “Бусад нь” гэж хэн юм бэ. Мүднякийнхантайгаа хамт Ардчилсан хүчний холбоонд дагаар орсноос нь дүгнэвэл, тэр­бээр зорилго нэгт Н.Алтанхуяг руу овоо хараагаа хэдийнэ онилсон. Н.Алтанхуяг, Д.Эрдэнэбат нарын хамтын зорилго бол ирэх сонгуульд намаа үнэмлэхүй ялуулдаггүй юм гэхэд парламент дахь суудлаа хад­галах. Мөн намын үзэл баримтлалаа тууштай хадгалах билээ. Мэдээж хэрэг, намын эв нэгдэл тэдний хянал­таас гарах ёсгүй. Гэвч мань хоёрын зөрчилдөөнөөс болж, Ардчилсан нам нэгмөсөн ба­лар­лаа. УИХ дахь Ардчилсан намын бүлгийн 26 гишүүн нь Н.Ал­танхуяг, З.Энхболд гэсэн хоёр том бүлэглэлд хуваагдаж, намрын чуулган эхэлмэгц МАХН-ынхантай биш, хоорондоо толхилцож “нүд” болно. Түргэн зантай зарим нь хам­тарсан Засгийн газрын танхимыг сайн дураар орхиж, нөгөө хэсэг нь шазуур заан үлдэнэ. Энэ бол нэ­гэнт тодорхой болчихсон зүйл. Тэгэхээр УИХ-д МАХН, Ардчилсан нам, Иргэний зориг намаас гадна өөр нэгэн нам мэндэлж болзошгүй. “Ардчилсан намаас аль олон нам мэндэлснийг тэр гэх вэ” гэдэг юм гэхэд УИХ-д “зөвшөөрөлгүй” орж ирсэн шинэ намыг яах болж байна вэ. Ардчилсан нам дахь хагарлын үр дагавар эцэстээ хууль тогтоох дээд байгууллагыг ийм хөгийн байдалд хүргэж байна.

Н.Алтанхуяг, Д.Эрдэнэбат на­рын дэвэргэсэн Ардчилсан нам дахь их хямрал цаашид ч мөлхөө хэл­бэрээр үргэлжилнэ. Ардчилсан нам дотроо хоёр өөр “нам” болсон бол энэ нь цаашид задарч, “Ал­тан­гадас”, МҮДН, соцдекүүд, МоАХ гэхмэтчилэн фракциуд өөр хоорондоо тулалдаж эхлэх нь тодорхой боллоо. Ардчилсан хүч­ний холбооны гол гишүүдийн нэг гэгддэг С.Эрдэнэ “МоАХ байхгүй бол­лоо” гэснээс үүдэж, Н.Алтанхуяг нар МоАХ-ны партизануудын сэтгэл зүй дээр тоглож байгаа. МоАХ гэдэг бол Ардчилсан намд том хүч. Гэвч эрхэм гишүүний хэлсэн үгнээс болж, Ардчилсан хүчний холбооныхон том алдлаа. Харин энэ нь Н.Алтанхуягт хүчээ зузаатгах боломж юм. Ямартай ч тус нам ҮЗХ-ны хурлаа зарлаг. МАХН-ынхан Бага хурлын XII хуралдаанаасаа ямар шийд гаргахыг Ардчилсан намынхан хүссэн ч, эс хүссэн ч харзнаж л байна. Гэхдээ Ардчилсан нам дахь хоёр “толгой” буюу Н.Алтанхуяг, Д.Эрдэнэбат нарын толхилцооныг яах ч аргагүй. Угтаа тэд стресс тест хэмээгчийг хамтдаа санаачилж, намдаа “халууны шил” зүүх байсан юм. Гэвч хожимджээ.

С.БАТТУЛГА

Зохиогчийн эрх:
 "Улс төрийн тойм" сонин