УИХ-ын намрын чуулганы хугацаанд ажлаа хамгийн олон удаа таслан УИХ-ын гишүүн бол Х.Баттулга, С.Лүндэг нар. Тэдэнд ямар хариуцлага тооцох талар УИХ-ын Ёс зүй дэгийн байнгын хорооны дарга Б.Баярбаатар өнөөдөр сэтгүүлчдэд мэдээлэл өгөхдөө "УИХ-ын гишүүн А.Ариунзаяагаар ахлуулсан ажлын хэсэг байгуулсан. УИХ-ын гишүүн С.Лүндэгийн чуулганы хуралдаанаа тасалсан цаг нь хуульд заасан цагтаа арай хүрээгүй юм билээ. Харин УИХ-ын гишүүн Х.Баттулгын хувьд хуульд заасан цагтаа хүрсэн учраас хариуцлага тооцно.

Дүрэм журмаараа тухайн УИХ-ын гишүүнд сануулах, уучлалт гуйх, цалин хасах гэсэн саналаар байнгын хороо хуралдаж шийдвэрлэнэ" гэв.

УИХ-ын Ёс зүй, дэгийн байнгын хороо өнгөрсөн нэгдүгээр сарын /2025.01.21/ хуралдаанаар ажлаа байнга тасалж буй УИХ-ын гишүүн Х.Баттулга, С.Лүндэг нарт хариуцлага тооцох асуудал хөндөж байсан. Тодруулбал, УИХ-ын гишүүн С.Лүндэг 11 удаагийн чуулганы хуралдаанд нэг ч суугаагүй бөгөөд есөн удаагийн хуралдаанд эмнэлгийн чөлөөтэй байсан бол хоёрт нь тасалжээ. Харин УИХ-ын гишүүн Х.Баттулгын хувьд чуулганы хуралдааны нэгд нь л суусан бөгөөд гуравт нь эмнэлгийн чөлөөтэй байж, долоон удаа тасалжээ.

Тиймээс УИХ-ын Ёс зүй, дэгийн байнгын хорооноос Х.Баттулга, С.Лүндэг нарт байнгын хорооны хуралд дуудах албан бичиг хүргүүлсэн талаар мэдээлж байв.

Энэ талаар өмнө нь УИХ-ын Ёс зүй дэгийн байнгын хорооны дарга Б.Баярбаатар мэдээлэл өгөхдөө “УИХ -ын намрын ээлжит чуулган энэ долоо хоногт завсарлах болов уу. Ирцтэй холбоотой мэдээллийг А.Ариунзаяа гишүүн нарийвчилж гаргах шаардлага байна. Хурадаа суудаггүй гишүүд байна, Х.Баттулга, С.Лүндэг. Нийгэм өнөөдөр хуралдаа суухгүй байгаа гишүүдэд онцгой анхаарал хандуулж байна. Хууль тогтоох байгууллагад төлөөллийн ардчиллыг хангаж сонгогдож ирсэн юм бол хуралдаа сууж байх ёстой. УИХ-ын гишүүнээр сонгогдсон хүний ажил нь, үүрэг нь. Тийм учраас гишүүдийн ирцийн нарийвчилсан мэдээллийг оруулж ирж, шаардлагатай бол дараагийн хуралд Монгол Улсын Их хурлын гишүүний ёс зүйн дүрмийн дагуу хариуцлага тооцох саналыг оруулж ир гэж та бүхэндээ хэлье” гэдгийг хэлж байсан юм.