Дэлхийн ардчиллын талаарх мэдээллийг багцлан хүргэдэг “V-Dem” институти ес дэх жилдээ ардчиллын тайлангаа танилцууллаа. "Ардчиллын тайлан 2025: Автократчлалын 25 жил – Ардчилал ялагдал хүлээв үү?" нэртэй тус тайланг гуравдугаар сарын 13-нд нийтэлсэн байна. Энэхүү тайлангаар өнгөрсөн 25 жилийн дэлхийн ардчиллын чиг хандлагад дүн шинжилгээ хийж, автократчлалын өсөлт болон түүний дэлхий даяарх ардчилалд үзүүлэх үр дагаврыг онцолсон байна.

Сүүлийн тайлангаас дараах хоёр үзүүлэлтийг голчлон харж болно.

Нэгдүгээрт, сүүлийн 25 жилийн хугацаанд ардчиллын үзүүлэлт нь мэдэгдэхүйц буурсан орнуудын хувьд ухрах хандлага ажиглагдсаар байна.

Хоёрдугаарт, үзэл бодлоо илэрхийлэх эрх чөлөө нь мэдэгдэхүйц хумигдсан орнууд нэмэгдэж буй нь ардчилал тогтсон болон шинээр хөгжиж буй орнууддаа нөлөөлж байна.

Тус тайланд улс орнуудыг дэглэмийн төрлөөр нь либерал ардчилал, электорал ардчилал, электорал автократ, хаалттай автократ гэж ангилжээ. Монгол Улсын тухайд электорал ардчилал төрөлд Бенин, Гайана, Индонез, Маврики улсуудтай хамт багтсан байна.

Мөн автократчилагдаж байгаа орнуудыг жагсаажээ. Одоогоор 45 оронд автократчлал явагдаж байна. Энэ тоо өнгөрсөн онд 42 байжээ. Эдгээр 45 улсын 27 нь эхэндээ ардчилсан улсууд байсан. Харин 25 улс нь ардчилал руу буцалгүйгээр автократчлал руу унаж байна гэжээ. Үүнд нь Монгол Улс багтсан байна.