ZywOo: Би s1mple-ээс илүү боллоо гээд зогсохгүй

Цахим спортын "CS2" төрлийн энэ оны эхний томоохон тэмцээнүүдийн нэг болох "ESL Pro League"-ийн 21 дэх улирал өндөрлөлөө. Шведийн Стокхольм хотод болсон энэхүү тэмцээнд Францын "Vitality" баг түрүүлж, Германы "MOUZ" баг үзүүрлэв. Финалд "Vitality" өрсөлдөгчөө 3-0 гэсэн харьцаатай илт илүүрхжээ. Тэд хагас шигшээд Монголын "The MongolZ" багийг 2-1 гэсэн харьцаатай хожсон билээ.

400 мянган ам.долларын шагналын сантай энэхүү тэмцээнд түрүүлсэн баг 100 мянган ам.долларыг хүртсэн бол хагас шигшээд шалгарсан багууд 25 мянган ам.долларын эзэд болжээ.

Энэ тэмцээний шилдгээр "Vitality" багийн супер од "ZywOo" буюу Матье Эрбо тодорч, "CS"-ийн түүхэнд "MVP" хүртсэн тоогоороо Украины алдарт тамирчин "s1mple" буюу Александр Костылевыг гүйцжээ. Түүхэндээ "ZywOo" болон "s1mple"-ийн өрсөлдөөн гайхалтай өрнөж, энэ спортыг чимэж байсан ч сүүлийн үед "s1mple" түр завсарлага аваад буй.

"ESL Pro League"-д түрүүлж, "MVP" болсон 24 настай Мэтье Эрбо дараах ярилцлагыг өгчээ.

-Баяр хүргэе, "ZywOo". Сэтгэгдлээсээ хуваалцаач?

-Финалд хожсон учир мэдээж хэрэг сайхан байна. Бид үнэхээр их хүсч байсан, яг "apEX" буйдан дээр сууж байхдаа хэлсэн шиг, "Intel Grand Slam"-г авахыг маш их хүссэн. Тиймээс энэ ялалтын дараа үнэхээр сайхан байна. Өнөөдөр бид гайхалтай "CS" тоглолоо гэж бодож байна. Багтаа тун баяртай байна. Учир нь бид өнөөдөр үнэхээр сайн тоглолтоо харуулж чадлаа. Өнөөдөр бид ямар ч алдаа гаргаагүй, тэдэнд ашиглах зүйл үлдээгээгүй гэж бодож байна. Тиймээс энэ тоглолтын гүйцэтгэлдээ үнэхээр баяртай байна.

-Финалын тоглолтыг ингэж өрсөлдөөнгүй байна гэж төсөөлсөн үү? Хурдан болж, өндөрлөлөө.

-Бид финал ийм өрсөлдөөнгүй байна гэж бодоогүй. Гэхдээ ESL Pro League эсвэл Katowice-д тоглосон шигээ тогловол финалд хожих нь гарцаагүй гэдгийг мэдэж байсан. Бидний финал эхлэхээс өмнөх сэтгэлзүй ийм л байсан. Хэрэв бид өөрсдийн A төлөвлөгөө, A тоглолтоо гаргаж чадвал тэдэнд ямар ч боломж байхгүй. Энэ бол бидний тоглолт эхлэхээс өмнө мэдэрсэн зүйл.

-Танай баг яг одоогоор бусад багуудаасаа нэг алхмын урд байгаа юм шиг санагдлаа. Үүний шалтгаан нь юу вэ?

-Үнэндээ мэдэхгүй байна. Магадгүй хувь тоглогчийн тал дээр илүү байгаа байх. Манай багийн хүн бүр сайн тоглож байгаа гэж бодож байна. Финалаас ч үүнийг харж болно. Бидний хамгийн муу үзүүлэлт 1.24 байсан бол хамгийн сайн үзүүлэлт нь 1.33 байлаа. Хүн бүр сайн тоглож байна. Багийн тоглолт дээр ч үүнээс илүү сайн тоглоно гэж бодохгүй байна. Мэдээж бид бага зэрэг алдаа гаргаж байгаа гэхдээ финалд энэ бол асуудал биш ээ.

Хувийн тоглолт, багийн тоглолт сайн байгаа учир бид одоогоор дэлхийн хамгийн шилдэг багуудын нэг боллоо гэж би бодож байна. Үүнд бол эргэлзээ алга. Бид олон ч цомд, олон ч тэмцээнд түрүүлж чадна. Дээрх хоёр үзүүлэлт сайн байгаа учир бид "Vitality"-г яг одоо хүчирхэг байгааг харж байна.

-Энэ тэмцээний "MVP" медалийнхаа ачаар та "s1mple"-ийн рекордыг эвдлээ. Үүн дээр өөрийнхөө бодлыг хуваалцаач?

-Өмнө нь хэлсэнчлэн, тэмцээн эхлэхээс өмнө би үүнд төдийлөн анхаараагүй ээ. Учир нь багтайгаа байхад, та бүхэн финал дээр харсан шиг, хэн ч гайхалтай тоглолт гаргаж чадна. Би зүгээр л өөрийн үндсэн тоглолтоо үзүүлж, хүлээх хэрэгтэй гэдгээ мэдэж байсан. Магадгүй энэ удаагийн EPL-д биш байсан ч, дараагийн хоёр, гурван тэмцээнээс "MVP" авч чадна гэж бодож байсан. Тиймээс би үүнд тийм ч их төвлөрөөгүй. Зүгээр л өөрийнхөөрөө байж, эхлээд багийнхаа төлөө тоглохыг хичээж, дараа нь хувь хүнийхээ талаар бодож эхэлсэн.

Юуны өмнө, финалын өмнө би үүнд төдийлөн анхаараагүй байсан. Гэхдээ одоо үнэхээр баяртай байна. Би "s1mple"-ээс нэгээр илүү боллоо. Өнгөрсөн зургаан жилийн турш үзүүлсэн тоглолтдоо маш их баяртай байна. Би зүгээр л үргэлжлүүлэн зүтгэсээр байх болно. Хөдөлмөрлөхөө зогсоохгүй, нэгээр илүү боллоо гээд хэзээ ч зогсохгүй.

-"MVP" хүртсэн тоогоороо бүгдийг тэргүүлээд эхэллээ. Энэ бүхэн таны тамирчны замналд юуг өгүүлж байна вэ? Мэдээж цаашдаа ч олон шагнал нэмэхээр харагдаж байна.

-Таны хэлсэнчлэн би илүү олныг нэмж чадахаар байна. Бас "s1mple"-ээс нэгээр илүү боллоо гээд зогсохгүй. Би зүгээр л 25, 30 "MVP" шагнал авч чадна гэдгээ харуулах болно. Би зогсолтгүй хөдөлмөрлөж, өөрийнхөөрөө тоглож, одоо хийж байгаа зүйлээ үргэлжлүүлсээр байх болно. Би өөртөө итгэлтэй тоглохоо, "Vitality" шиг тоглохоо хэзээ ч зогсоохгүй.

"Team Vitality"-ийн дараагийн тэмцээн энэ Лхагва гаригт Португалд эхэлнэ. 400 мянган ам.долларын тус тэмцээнд Монголын "The MongolZ" болон "The Huns Esports" багууд өрсөлдөнө.

Багтаа "ropz"-ийг нэгтгэсэн "Vitality"-г энэ жил зогсооно гэдэг амаргүй байна. Тэд бол "The MongolZ"-ийн хожиж үзээгүй бараг ганц баг билээ.