Төрийн цомхотгол биш ӨРГӨТГӨЛ!

Хамтарсан Засгийн газраас төрийн албыг 30 хувь цомхотгохоо мэдэгдсэн. Гэвч үнэндээ цомхотгол биш өргөтгөл хийж буй нь нийгэмд багагүй шүүмжлэл дагуулах болсон. Зөвлөх, тусгай үүрэгт Элчин сайд, Бүрэн эрхэт төлөөлөгч, хяналт хариуцсан менежер, бүтээмж хариуцсан менежер гэх шинэ содон албан тушаалын нэрс ар араасаа дуулдаж эхлэв.

Сүүлд Засгийн газрын хуралдаанаар хэд, хэдэн томилгоог хийсний нэг нь Зам тээврийн дэд сайд асан Л.Халтарыг Шинэ Хархорум хотын захирагчаар томилсон юм.

ТУСГАЙ ҮҮРЭГТ ЭЛЧИН САЙДУУД

Ерөнхий сайд Л.Оюун-Эрдэнэ “Үндэсний аюулгүй байдлын зөвлөл /ҮАБЗ/-ийн гишүүнээр ажиллаж байсан хүмүүсийг тусгай үүрэгт Элчин сайдаар ажиллах урилгыг хүргүүлсэн" гэж "Өдрийн сонин"-д ярилцлага өгөхдөө мэдэгдсэн. Тэгвэл Засгийн газар ээлжит хуралдаанаараа /2025.03.12/ Монгол Улсын Ерөнхийлөгч асан Н.Энхбаяр, Монгол Улсын Ерөнхий сайд асан М.Энхсайхан, Р.Амаржаргал, С.Баяр, Сү.Батболд, М.Энхболд, Ж.Эрдэнэбат, ҮАБЗ-ийн Нарийн бичгийн дарга асан А.Гансүх нарыг тусгай үүрэгт Элчин сайдаар томилохыг Гадаад харилцааны сайд Б.Батцэцэгт даалгасан.

ҮАБЗ-ийн гишүүнээр ажиллаж байсан дээрх улстөрчдийн зарим нь хуулийн байгууллагад шалгагдаж, шүүхээс ял авсан нь олон нийтийн шүүмжлэл дагуулж байгаа юм.

Гэхдээ эдгээр улстөрчийг гадаад улсад Элчин сайдаар томилон ажиллуулахгүй. Харин Монголд хэрэгжих мега төслүүд болон олон улсын томоохон хэлэлцээрт өөрсдийн туршлагаасаа хуваалцаж, зөвлөх үүрэгтэй бөгөөд 1990 оноос хойш ҮАБЗ-д байсан гишүүд ийм тодорхойлолттойгоор тэмдэглэлд туссан байдаг гэдгийг албаныхан мэдээлсэн юм. Өөрөөр хэлбэл, ҮАБЗ-ийн гишүүн гэдэг нь үе үеийн төрийн гурван өндөрлөг гэсэн үг юм.

ЗӨВЛӨХ, БЭТ, МЕНЕЖЕРҮҮДИЙН ТОМИЛГОО

Төрийн томилгоо үүгээр тогтохгүй. МАХН-ын Ерөнхий нарийн бичгийн даргаар ажиллаж байсан Э.Эрдэнэжамъян, Гэр хорооллын хөгжлийн намын дарга Б.Батсүх, Тагнуулын ерөнхий газрын Сөрөх тагнуулын газрын дарга асан Д.Цогтбаатар нар Ерөнхий сайдын зөвлөх болсон.

Харин УИХ-ын гишүүн асан Ж.Батзанданг Стратегийн ач холбогдолтой ордуудын төрийн эзэмшлийн хувь хэмжээг тогтоох хэлэлцээр хийх Засгийн газрын Бүрэн эрхт төлөөлөгч/БЭТ/-өөр томилсон.

Үүнээс гадна төрийн өмчит компаниудад томилсон жишээ олон бий. Тухайлбал, өнгөрсөн нэгдүгээр сард улстөрчдийн саалийн үнээ гэж нэрлэгддэг “Эрдэнэт” үйлдвэрт хяналтын асуудал хариуцсан менежерээр Өвөрхангай аймгийн Ардчилсан намын дарга асан И.Мөнхжаргалыг томилсон.

Мөн УИХ-ын гишүүн Х.Баттулгын туслах асан Б.Саруулыг ч мөн ЗГХЭГ-ын дэд даргын үүрэг гүйцэтгэгчээр мөн саяхан томилсон бол “Эрдэнэс Тавантолгой” ХК-д С.Баярмөнхийг менежерээр томилсон.

Мөн “Эрдэнэс Тавантголгой” ХК-д менежерээр Ардчилсан намын гишүүн Н.Пунцагийг томилсон бол “Тавантолгой төмөр зам” ХХК-ийн гүйцэтгэх захирлаар Ховд аймгийн Засаг дарга асан Б.Дүгэржавыг томилсон. Түүнийг одоогийн Батлан хамгаалахын сайд С.Бямбацогтын гарын хүн гэгддэг. Үргэлжлүүлэн Эрчим хүчний сайд асан Д.Зоригтын туслах асан Н.Жавзанпагмыг “Эрдэнэс Монгол” ТӨХК-ийн хяналт хариуцсан менежерээр, Б.Даваацэрэнг “Монголросцветмет” ТӨҮГ-ийн хяналт хариуцсан менежерээр томилсон байдаг. Мөн “Монголросцветмет” ТӨҮГ-ын бүтээмж хариуцсан менежерээр УИХ-ын гишүүн асан М.Оюунчимэгийг томилсон.