Хятадын төрийн өмчит газрын тосны компаниуд энэ сард Оросын бүтээгдэхүүнээс зайлсхийж байна. Тодруулбал, ОХУ-д саяхан тавьсан АНУ-ын хориг арга хэмжээний дагуу "Sinopec", "Zhenhua Oil" гэсэн хоёр импортлогч компани худалдан авалтынхаа хэмжээг бууруулжээ.

Байдены засаг захиргааны нэгдүгээр сарын 10-нд "Сургутнефтегаз" болон "Газпром нефть"-д авсан хориг арга хэмжээний дараа Оросын хамгийн том худалдан авагчид болох Энэтхэг, Хятад руу газрын тосны нийлүүлэлт огцом буурсан. Гэхдээ хоригт багтаагүй нийлүүлэгчдийн нөлөөгөөр Оросын тээвэрлэлт эргэн сэргээд байв.

Хятадын төрийн өмчит тоглогчид худалдан авалтаа бууруулсан нь Оросын газрын тосны үнэд сөргөөр нөлөөлж, гал зогсоох хэлэлцээрийн өмнө нэмэлт дарамт учруулах болов. Бээжинд төвтэй газрын тосны компанийн эх сурвалж мэдээлэхдээ "Манай компани дайн зогсоох АНУ, ОХУ-ын хэлэлцээрээс тодорхой үр дүн хүлээж байгаа тул наймаагаа түр зогсоосон" гэжээ.

"Сургутнефтегаз" болон "Газпром нефть"-ийн бүтээгдэхүүн далайн тээврийн 30 орчим хувийг эзэлдэг. Хоёр компани Хятад руу сард 1.2 сая тонн орчим буюу өдөрт ойролцоогоор 300 мянган баррель нефть экспортолдог аж. Харин Азийн хамгийн том түүхий нефтийн худалдан авагч "Sinopec" баруун Африк, Ойрхи Дорнод, Бразилийн ачаагаар Оросын импортын цоорхойг нөхөж байгааг эх сурвалж мэдээллээ.