ХӨСҮТ-өөс Улаанбурхан өвчний нөхцөл байдлын мэдээллийг танилцууллаа. Хамгийн сүүлд Дундговь аймагт улаанбурхан өвчний хоёр тохиолдол батлагдаад байна. Ингэснээр улсын хэмжээнд лабораториор батлагдсан нийт 24 тохиолдол, сэжигтэй 19 тохиолдол бүртгэгдэж, хяналтад авсан байна. Өмнөговь, Дундговь аймгаас ирүүлсэн лабораторийн сорьцуудаас улаанбурхан батлагдсантай холбоотойгоор ХӨСҮТ-өөс тандалт, эмнэлзүй, лабораторийн баг ажиллахаар гарсан бол Говь-Алтай, Баян-Өлгий, Ховд аймагт мэргэжил арга зүйн зөвлөмж, дэмжлэгт хяналт хийж ажиллахаар тандалт, хариу арга хэмжээний баг гарсан байна.

Дундговь аймгийн хэмжээнд энэ сарын 15- 28-ны өдрийг дуустал Политехникийн коллеж, сургууль, цэцэрлэг, хүүхдийн сургалтын байгууллага, өдөр өнжүүлэх төвийн үйл ажиллагааг хязгаарлаж, хичээл, сургалтыг цахимд шилжүүлсэн байна.

Улаан бурхан өвчний үед өндөр халуурах, толбон гүвдрүү тууралт гарах, ханиалгах, хамраас нус гоожих, нүдний салст үрэвсэх шинж тэмдэг илэрдэг.Нууц үеийн хугацаа 10-12 өдөр үргэлжилдэг. Аймгийн Эрүүл мэндийн газар, Нэгдсэн эмнэлгээс тус өвчний эсрэг хариу арга хэмжээ авч, Нэгдсэн эмнэлгийн Хүүхдийн тасагт ойрын хавьтлуудыг тусгаарлах, 9 сартай болон 2 настай хүүхдүүдийг дархлаажуулах ажлыг зохион байгуулж байгааг эрүүл мэндийн газрын дарга Б.Алтантөгс тодотгов. 2024 оны жилийн эцсийн байдлаар тус аймгийн хэмжээнд улаан бурхан, улаануудын 1 дүгээр тунгийн дархлаажуултыг 496 хүүхэд хийлгээгүй, 2 дугаар тунгийн дархлаажуулалтыг 655 хүүхэд хийлгээгүй хоцорсон байна. Тиймээс нөхөн дархлаажуулалт хийх зайлшгүй шаардлагатай ба иргэдийг хүүхдүүдээ товлолт дархлаажуулалтад цаг алдалгүй хамруулахыг мэргэжлийн байгууллагаас анхаарууллаа.