Орос, Украины талууд Баасан гаригаас Бямба гаригт шилжих шөнө харилцан хүчтэй агаарын цохилтууд өгчээ. Хоёр тал тус тусын нутаг дэвсгэрт дайсны 100 гаруй нисгэгчгүй нисэх онгоц орж ирсэн гэж мэдээлэв.

ОХУ-ын ерөнхийлөгч Путин АНУ-ын тусгай элч Стив Виткоффтай уулзаж, Украинд 30 хоног гал зогсоох Вашингтоны саналын талаар дэлгэрэнгүй ярилцсанаас хойш 24 цаг хүрэхгүй хугацааны дараа эдгээр халдлага болжээ.

Украины ерөнхийлөгч Зеленский Бямба гаригт мэдээлэл өгөхдөө ОХУ-ыг хилийн дагуу цэрэг цуглуулж байна гэж буруутгасан юм. Тэрбээр "Оросын цэргийн хүч нэмэгдсээр байгаа нь Москва дипломат харилцааг үл тоомсорлох бодолтой байгааг харуулж байна. Тэд дайныг сунжруулж байгаа нь тодорхой байна” гэжээ. Мөн украин цэргүүд Курскт бүслэгдсэн гэсэн мэдээллийг тэр үгүйсгэж, "Курскт манай ажиллагаа үргэлжилж байна. Манай цэргүүд Курскт Орос, Хойд Солонгосын цэргүүдийг саатуулсаар байна. Манай цэргүүд бүслэгдсэн зүйл байхгүй" гэв.

Бямба гаригийн байдлаар ОХУ 178 нисгэгчгүй онгоц, хоёр баллистик пуужин харвасан байна. Энэ нь Шахед довтолгооны нисгэгчгүй онгоц болон дуураймал нисгэгчгүй онгоцуудын холимог байсан бөгөөд агаарын довтолгооноос хамгаалах системийг төөрөгдүүлэх зорилготой. Эдгээрээс 130 орчим нисгэгчгүй онгоцыг нь Украин устгасан бол 38 нь байндаа хүрэлгүй алга болсон аж.

Мөн ОХУ-ын арми Украины эрчим хүчний байгууламжид ихээхэн хохирол учруулжээ. Украины хувийн эрчим хүчний "DTEK" компанийн мэдээлснээр ОХУ Днепропетровск, Одесса мужуудын эрчим хүчний дэд бүтцэд цохилт өгсөн байна.

Харин нөгөө талд Оросын Волгоград мужид "Лукойл" компанийн газрын тос боловсруулах үйлдвэрийн ойролцоо нисгэгчгүй нисэх онгоцны хаягдал унасны улмаас гал гарчээ. Ойролцоох нисэх онгоцны буудлууд үүнээс болж нислэгээ түр зогсоосон байна.