Цахим спортын "CS2" төрлийн "ESL Pro League"-ийн 21 дэх улирлын плей-оффын шат эхэлсэн. Дэлхийн шилдэг найман баг тунасан бөгөөд хагас шигшээд өрсөлдөх дөрвөн багийн нэрс бүрэн тодорлоо. Монголын "The MongolZ" баг орон нутгийн цагаар өчигдөр/2025.03.14/ шөвгийн наймын хасагдах шатны тоглолтоо Украины "Natus Vincere" буюу "NaVi" багийн эсрэг хийв. Хоёр багийн өмнөх учраа бүрт Украины баг хожсон гэх сүрдэм үзүүлэлттэй байсан юм.

Харин энэ удаад бүх зүйл өөрөөр өрнөлөө. Монголын баг "Mirage" болон "Ancient" дээр тус бүр 13-6 гэсэн харьцаатай хожиж, нийлбэр дүн 2-0-ээр дараагийн шатанд шалгарав. Хоёр мапын тоглолтод "The MongolZ"-ийн бүх тоглогчид нэмэх үзүүлэлттэй тогложээ.

Тоглолтын дараа "NaVi"-ийн дасгалжуулагч Андрей Городенский буюу "B1ad3" ярихдаа "Бид илүү эрч хүчтэй байж, нэг шат ахин өөрсдийн тоглолтоо гаргаж чадсангүй. Тэд тоглолтын турш илүүрхлээ. Үе бүрт гаргалгаа олж чадсангүй. Хурдан хариу үйлдэл гаргаж, асуудлыг цэгцлэх байсан юм. Бид өнөөдөр үнэхээр муу байлаа" гэжээ.

"The MongolZ" баг өнөөдөр шөнө 01:30 цагаас Францын "Vitality" багийн эсрэг тоглоно. Хожсон нь финалд хүрэх учиртай. Монголын багийн хожиж үзээгүй цөөн багийн нэг нь "Vitality" билээ.

Өчигдрийн тоглолтын дараа "The MongolZ"-ийн дасгалжуулагч "maaRaa" буюу Б.Эрдэнэдалайг тэмцээнийг зохион байгуулагч "ESL" онцолсон нь олны анхаарлыг татжээ. Энэтхэг гаралтай "CS2"-ийн алдарт тайлбарлагч, аналист "Bleh" буюу Судхен Вахенбам түүнийг тодорхойлохдоо "Тэр бол Монголын "CS"-ийн өдгөө хаана байгаа шалтгаан. Хаан ширээний ар дахь жинхэнэ хаан" гэжээ.

Дасгалжуулагч "maaRaa"-ийн өмссөн бомбер дээр хуучны "The MongolZ"-ийн лого байгааг та бүхэн анзаарч байгаа биз. Өдгөө 34 настай түүний хувьд 2015 оноос хойш энэ багтай холбогдож, тоглогч, дасгалжуулагчийн хувиар хүчин зүтгэж байна. Түүний арга ухаан, тактик ур чадвар энэ багийг өдий зэрэгтэй явахад гол үүргийг гүйцэтгэж байгаа гэхэд хилсдэхгүй.