УИХ-ын хаврын чуулганыг ирэх долоо хоногийн Даваа гаригт /2025.03.17/ нээнэ. Ес дэх удаагийн парламентыг байгуулах УИХ-ын сонгууль өнгөрсөн оны зургадугаар сарын 28-нд болж, 126 гишүүнтэй анхны парламентыг бүрдүүлсэн билээ.

Үндэсний эв нэгдэл, аюулгүй байдлаа баталгаажуулах, олон намын төлөөллөөс бүрдсэн ардчилсан парламентат засаглалыг төгөлдөржүүлэх, сонгогчдын санал гээгддэггүй байх зэрэг олон эрх ашгийг нэгтгэн УИХ-ыг 126 гишүүнтэй болгох тогтолцооны өөрчлөлтийг Монгол Улс хийсэн.

Иргэдийн зүгээс, гишүүдийн тоог нэмсэн нь буруу биш хэдий ч иргэдийн амьдралд одоогоор эерэг, бодит өөрчлөлт авч ирсэн шийдвэрийг УИХ гаргаагүй гэдгийг онцолж байна.

УИХ-ын 126 гишүүний 78 нь том тойргоос, 48 нь намын жагсаалтаар сонгогдсон. Мөн 126 гишүүнээс 32 нь эмэгтэй гишүүн сонгогдсон нь нийт гишүүдийн 25 хувийг эзэлж, Монголын парламентад шинэ дээд амжилт тогтоосон төдийгүй Азидаа ч тэргүүлж буй. Гэхдээ парламентийнхан бодит амьдрал хөрсөн дээр буусан шийдвэр гаргахгүй байгааг иргэд шүүмжилж байна.

Тухайлбал иргэдийн хэлж байгаагаар, татвар, нийгмийн даатгалын шимтгэл, цахилгааны төлбөр, өргөн хэрэглээний бараа бүтээгдэхүүний үнэ өсч байгаа ч төр эдгээр зардлыг шат дараатайгаар дахин нэмэх талаар л ярьж байна. Угтаа бол иргэдийн цалин, тэтгэвэр нэмэгдэхэд хэрэглээний зардлууд дагаж өсөхгүй байх ёстой. Гэтэл хувьцааны ногдол ашиг тараах, хөдөлмөрийн хөлсний доод хэмжээг нэмэх сураг гарахад л бүх зүйлийн үнэ дагаж өсөөд байгаа. Үүнд хяналт ч, зохицуулалт ч алга. УИХ 126 гишүүнтэй болсноор олон нийтийн дуу хоолойг хүргэх, ард иргэдийн амьдралд ойр шийдвэр гаргах, баталж байгаа хууль тогтоомжоо ч бодит амьдралд нийцэхүйц гаргах байх гэж найдаж байсан. Гэхдээ намрын чуулганаар тийм шийдвэр гараагүй. Цаашид хэрхэхийг л харах үлдлээ гэв.