Оросын эсрэг авсан хориг арга хэмжээний жагсаалтаас тус улсын дөрвөн хүнийг хасах болжээ. Үүний үр дүнд бусад 2400 гаруй хүний хоригийг дахин зургаан сараар сунгах тухай Франс Пресс агентлаг мэдээлэв. Дипломат эх сурвалжийн мэдээлснээр, өнгөрсөн хугацаанд хориг арга хэмжээний хүрээнд хөрөнгөө царцааж, визээ цуцлуулаад байсан бизнес эрхлэгч Владимир Рашевский, Вячеслав Кантор, Оросын спортын сайд Михаил Дегтярев болон тэрбумтан Алишер Усмановын эгчийг хасах болсон байна. Мөн Рашевскийг Унгар улсын дарамт шахалтаас бус хоригт орж, хөрөнгөө царцаахуйц хүнд гэмт хэрэг үйлдээгүй гэж үзсэний үндсэн дээр хоригоос чөлөөлөх болсон гэж Ройтерс агентлаг онцолсон юм.

Тодруулбал, Оросын эсрэг авсан хориг арга хэмжээгээ Европын холбоо зургаан сар тутамд нэг удаа сунгах ёстой байдаг.

Улмаар уг арга хэмжээг сунгах санал хураалтын үеэр Оростой харьцангуй дотно харилцаатай байдаг Унгар улс эсэргүүцсэн аж. Эх сурвалжийн мэдээлснээр, Унгараас Европын холбоонд суугаа элчин сайд Пүрэв гаригт /2025.03.13/ Оросын арга хэмжээг сунгахаас өмнө тэрбумтан Михаил Фридманыг тус холбооны хоригийн жагсаалтаас хасахыг шаарджээ. Гэсэн хэдий ч үг хүсэлтийг Европын холбоо няцааж, хөнгөн гэмт хэрэгтэй гэж үзсэн хүмүүсийг чөлөөлөх болно гэдгээ мэдэгдсэн байна.

Унгарын үзэж буйгаар, гуравдугаар сарын 15-нд хүчингүй болох арга хэмжээг сунгах юм бол Орос Украины хэлэлцээг амжилтгүй болно гэж эмээж байна.

Мөн дайныг зогсоох Орос, Украины хэлэлцээд саад учруулна гэж үзжээ. Хэрэв хоригийг сунгах бол холбооны 27 гишүүн орон зөвшөөрөх хэрэгтэй бөгөөд Унгарын саналыг татахын тулд Европын холбоо шаардлагыг нь биелүүлэх болсон байна. Гэсэн хэдий ч Европын холбооны ерөнхийлөгч Урсула фон дер Лейен "Орост тавьсан хориг арга хэмжээг сунгах шийдвэр гаргаж,дөрвөн хүнийг чөлөөлсөн ч Украиныг дэмжих бидний шийдвэр бат бөх байх болно" гэж мэдэгджээ.