Улаанбаатар хотын авто замын түгжрэлийг бууруулах ажлын хүрээнд Туулын хурдны замын олон улсын нээлттэй тендерийг өнгөрсөн нэгдүгээр сарын 28-нд зарласан бөгөөд өнөөдөр /2025.03.14/нээхээ Улаанбаатар хотын захирагч Х.Нямбаатар мэдэгдэж байв. Гэвч хойшилжээ. Албаны хүний өгсөн мэдээллээр тендерт оролцож байгаа компаниуд тодруулга авах шаардлага үүссэнээр тендерийг 14 хоногийн дараа нээхээр болсон юм байна.

Энэхүү хурдны зам нь Баянзүрхийн гүүрнээс Сонгинохайрхан дүүргийн нутаг дэвсгэрт баруун аймгууд руу салдаг аюулгүйн тойрог хүртэл нийт 32 км үргэлжлэх зургаан эгнээ бүхий гэрлэн дохиогүй, уулзваргүй нийслэл дэх хот доторх анхны хурдны зам болох юм.

Туулын хурдны замын бүтээн байгуулалтын ажлыг ирэх дөрөвдүгээр сарын сүүлээр эхлүүлж, 24 сарын дараа буюу 2027 оны тавдугаар сард ашиглалтад оруулахаар төлөвлөсөн. Хурдны зам ашиглалтад орсноор замын хөдөлгөөний дундаж хурд 13.5 хувиар нэмэгдэхээс гадна Дархан болон Замын-Үүд чиглэлийн дамжин өнгөрөх автотээврийн нэвтрүүлэх чадвар сайжирна. Мөн Улаанбаатар хотын гол болон туслах гудамж замын сүлжээний түгжрэл 10-20 хувиар буурах тооцоолол гарсан. Тус замыг барихад трасст 52 нэгж талбар өртөж  байгаа бөгөөд Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн дагуу газар чөлөөлөлтийг зохион байгуулж, нөхөн олговор болон газар дүйцүүлж олгоно. Туулын хурдны замтай дараа, дараагийн хоёрдугаар түвшний замууд огтлолцох юм.

Газар чөлөөлөлт хамгийн их хийгдэх газар нь Сонгинохайрхан дүүргийн нутаг дэвсгэр хамаарч буй аж.

Туулын хурдны замыг барьж байгуулахад шаардагдах төсөвт өртөг нь 1.9 их наяд төгрөг байх тооцоолол гарсан бөгөөд энэ оны санхүүжилт нь 538.6 тэрбум төгрөг байх юм.

Г.ХОРОЛ