Нийслэлийнхэн алхам тутамдаа аюул, эрсдэлтэй нүүр тулдаг гэхэд хилсдэхгүй. Өвөлдөө гялгар гантиг чулуун замууд дээр унаж бэртэж, зундаа үер усанд эд хөрөнгөө урсгаж тэр ч бүү хэл гудамж талбайд алхаж  байхдаа тогонд цахиулах, барилгын кранд өртөж амь нас, эрүүд мэндээрээ хохирох тохиолдол жил бүр гардаг. Наад захын эмгэнэлтэй жишээ бол цахилгааны ил задгай утас масслах, иргэд нийтийн гудамж талбайд тогонд цохиулах эрсдэл.

Хэдийгээр хотын холбогдох албаныхан ил задгай гэрлийн утас, цахилгааны монтажуудыг жил бүр засварладаг ч зарим байршилд засвар огт хийхгүй байгааг иргэд хэлж буй.

Тэгвэл тус байршлуудад болон явган хүний зам, стандарт бус, аюултай хэсгүүдийг хянах, зөрчлийг бүртгэх ажлын хэсгийг дүүрэг бүрд байгуулахаар болжээ. Тус ажлын хэсэгт дүүргийн ЗДТГ, мэргэжлийн хяналт, цагдаа, төрийн байгууллагууд болон аж ахуй нэгжийн төлөөлөл багтах аж.

Хууль тогтоомж, хотын стандартыг мөрдүүлэх хүрээнд нийслэлийн Засаг дарга 2024 оны наймдугаар сарын 26-нд А/1022 дугаартай зарчим гаргасан. Тус захирамжид нийтийн ашиг сонирхлыг хамгаалах, иргэдийн эрүүл, аюулгүй орчинд ажиллах, амьдрах нөхцөлийг бүрдүүлэх зорилгоор холбогдох албаны хүмүүсийг багтаасан ажлын хэсгийг байгуулахаар тусгасан бөгөөд нийслэлийн хэмжээнд хяналт тавих ажлын хэсгийн бүрэлдэхүүнд холбогдох байгууллагуудын төлөөллийг багтааж, баталжээ. Тухайлбал,

• Ажлын хэсгийг хотын даргын нэгдүгээр орлогч даргалж,
• Хотын захирагчийн нийгмийн хөгжил, бүтээн байгуулалтын бодлого хариуцсан зөвлөх,
• Нийслэлийн ерөнхий архитектор,
• Цөмийн энергийн комиссын нарийн бичгийн дарга,
• Газар зохион байгуулалтын газрын улсын байцаагч нар,
• Хотын ерөнхий менежер,
• Нийслэлийн Засаг даргын тамгын газрын дарга,
• Баянзүрх, Баянгол, Сонгинохайрхан, Сүхбаатар, Хан-Уул, Чингэлтэй дүүргийн засаг дарга нар,
• НЗДТГ-ын хууль тогтоомж, гэрээ, эрх зүйн газрын дарга зэрэг 40-өөд хүний бүрэлдэхүүнтэй ажлын хэсэг байгуулсан байдаг.

Гэвч нийслэлийн хэмжээнд тус ажлын хэсгийнхэн нэг бүрчлэн хүрч ажиллаж, зөрчлийг бүртгэж арилгалуудахад хангалттай биш байгаа аж. Тиймээс дүүрэг бүрд зөрчил арилгах, хотын стандартад хяналт тавих 15-20 хүний бүрэлдэхүүнтэй дэд ажлын хэсэг ажиллахаар болжээ.