Украины тал 30 өдрийн гал зогсоох хэлэлцээрийн саналыг хүлээн зөвшөөрөхийн зэрэгцээ одоо бол бүх зүйл АНУ-ын ятгалгаас хамаарна гэж мэдэгдээд буй. Гэхдээ "Бөмбөг Оросын талбайд байна" гэж АНУ-ын Төрийн нарийн бичгийн дарга Марко Рубио хэлсэн билээ.

Тэгвэл АНУ-ын төлөөлөгчид гал зогсоох хэлэлцээрийн хүрээнд ОХУ-ыг зорисныг Дональд Трамп мэдэгдлээ. Чухам ямар албан тушаалтнууд гэдгийг тэр тодорхой дурдсангүй. Гэхдээ Цагаан ордны хэвлэлийн төлөөлөгч Кэролин Левитт сэтгүүлчдэд мэдээлэл өгөхдөө "Үндэсний аюулгүй байдлын дарга Майк Уолтз Оросын талтай ярилцсан" гэж хэлсэн аж. Мөн "Бид энэ төлөвлөгөөнд гарын үсэг зурахыг Оросоос шаардах болно. Бид энх тайванд урьд хожид байгаагүйгээр ойртож ирээд байна" гэжээ.

Ойрхи Дорнодын элч төлөөлөгч Стив Виткофф Саудын Араб дахь хэлэлцээний дараа Москваг зорино гэх мэдээллийг энэ долоо хоногийн эхээр эх сурвалж мөн өгч байв.

Харин Кремль гал зогсоох саналыг судалж үзэж байна гэжээ. Мөн Трамп, Путин нар утсаар ярих боломжтой гэж мэдэгдсэн байна.

Трамп Лхагва гаригт Ирландын ерөнхий сайд Мишеал Мартиныг Цагаан ордонд хүлээн авч уулзсан. Энэ үеэрээ тэр гал зогсоох саналын талаар эерэг зурвас хүлээж авснаа хэлсэн аж. Тэрбээр "Гэхдээ эерэг зурвас юуг ч илэрхийлэхгүй байж болно. Ноцтой нөхцөл байдал шүү дээ" гэжээ.

Гал зогсоох хэлэлцээрийн санал эрчимтэй яригдаж буй ч Орос, Украины нутаг дэвсгэрт дайн үргэлжилсээр байна. ОХУ-ын арми Зеленскийн төрсөн нутаг Кривой Рог болон Одесса, Днипропетровск, Харьковт цохилт өгсөн талаар бид өмнө нь мэдээлсэн билээ. Харин нөгөө талд ОХУ-ын Курск мужид Украин цохилт өгч байна.

Кремлийн хэвлэлийн төлөөлөгч Дмитрий Песковын хэлснээр Оросын цэргүүд Курскт амжилттай урагшилж, газар нутгаа эргүүлэн хяналтдаа авч байгаа аж. Тодруулбал, Оросын арми сүүлийн таван өдрийн дотор 24 суурин, 259 км2 талбайг 400 гаруй хоригдлын хамт эргүүлэн авчээ.

Тэгвэл ерөнхийлөгч Путин Курск дахь командлалын байранд айлчилсан тухай Кремль Лхагва гаригийн орой мэдэгдэв. Түүнийг Зэвсэгт хүчний Жанжин штабын дарга Валерий Герасимов дагалджээ. Путин хамгийн сүүлд өнгөрсөн оны наймдугаар сард Курскт айлчилсан билээ. Энэ айлчлалынхаа үеэр Путин бүс нутгийг бүрэн чөлөөлөх тушаалыг цэргүүдээ өгчээ. Курскт олзлогдсон украин цэргүүдийг террорист гэж үзэх аж. Мөн Курск хоттой зэргэлдээ орших Сумы мужид ирээдүйн болзошгүй халдлагаас хамгаалахын тулд шинэ хамгаалалтын бүс байгуулахаар төлөвлөж байгаагаа мэдэгдсэн байна.

Харин Украины армийн командлагч Александр Сирський зарим цэргээ Курскээс гаргаж байгаагаа мэдэгдсэн байна. Тэрбээр телеграмдаа "Хамгийн хүнд үед украин цэргүүдийн амийг аврах нь миний нэн тэргүүний зорилт. Өмнө нь тийм байсан, одоо ч адил" гэжээ.