Улсын онцгой комиссын даргын тушаалаар байгуулагдсан шуурхай хэсгийн бүрэлдэхүүн өнөөдөр /2025.03.12/ Дорнод аймгийн Хөлөнбуйр суманд ажиллаж, гал түймэрт өртсөн айл өрхөд иж бүрэн гэр болон бусад тусламжийг хүлээлгэн өгч байна.

УОК-ын нарийн бичгийн дарга, хурандаа Т.БАЯРХҮҮ:

-Санамсаргүй, анхаарал болгоомжгүй өчүүхэн жижиг зүйлээс болж маш их хэмжээний хохирол учирсан харамсалтай зүйл тохиолдлоо. Гэсэн хэдий ч түймэрт өртөж, орон гэрээ алдсан айл өрхүүдэд Монгол Улсын Засгийн газар, УОК-оос эхний ээлжид гэр олгох, мөн тухайн айл өрхийг малжуулах, дараагийн удаад амьжиргааг дэмжих, эрүүл мэндийн тусламж үйлчилгээг үзүүлэх зэрэг цогц арга хэмжээг авч хэрэгжүүлэхээр холбогдох байгууллагуудын төлөөлөлтэй хамтраад ажиллаж байна. Мөн зүүн бүсээс сонгогдсон УИХ-ын гишүүд бидэнтэй цаг тутамд холбогдож ажиллаж байгаа.

Эхний ээлжид бид Хөлөнбуйр сумын түймэрт өртсөн айлуудад гэрийг хүлээлгэн өглөө. Тусламжийн багцад таван ханатай гэрээс гадна хүнсний багц, өргөн хэрэглээний бараа, хөнжил, гудас зэрэг багтсан.

Шуурхай ажлын хэсгийн зорилго бол зүүн аймгуудад ойрын өдрүүдэд гарсан түймрийн хор уршгийг арилгах, түймэрт өртсөн айл өрхүүдэд УОК-ын тусламжийн барааг хүргэхээр ажиллаж байна. Ажлын хэсэгт Эрүүл мэндийн яамны эмнэлгийн тусламж үйлчилгээний баг, Мал эмнэлгийн ерөнхий газар, Хүнс, хөдөө аж ахуй хөнгөн үйлдвэрийн яам, Гэр бүл, хөдөлмөр, нийгмийн хамгааллын яам, Хөдөлмөр, халамж үйлчилгээний ерөнхий газар зэрэг холбогдох байгууллагуудын төлөөлөл багтсан. Мөн хил хамгаалах байгууллагынхан ажлын хэсэгт ажиллаж байна.

Нөхцөл байдлын тухайд, Хэнтий, Дорнод, Сүхбаатар зэрэг аймгуудыг дамнасан тал хээрийн түймэр сүүлийн хоёр хоног тархсанаас олон айл орон гэр, малгүй болсон харамсалтай зүйл тохиолдоод байгаа. Дорнод аймгийн Хөлөнбуйр суманд гал голомтолж гарсан бөгөөд 18 айл гэргүй болж, 20-иод айлын хашаа саравч шатаж, 6000-аад мал хорогдсон хохирлын урьдчилсан дүн мэдээ гарчээ. Малчдын сэтгэл санаа маш хүнд байгаа бөгөөд амьжиргааны эх үүсвэрээс салснаас нөхцөл байдал хэцүү байгааг аймгийн удирдлагууд хэлж байна.