Нийслэлийн Засаг дарга Х.Нямбаатар өнөөдөр /2025.03.12/ цаг үеийн асуудлаар сэтгүүлчдэд мэдээлэл өглөө.

Тэрбээр "Надтай холбоотой шүүхийн ямар ч тогтоол гараагүй. Эко автомашин импортлогчдын холбооныхон шүүхэд "Хотын дарга бидний нэр төрд халдсан" гэдэг үндэслэлээр нэхэмжлэл гаргасан байна лээ. Нийслэлийн Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхийн шүүгч нэхэмжлэлийн дагуу иргэний хэрэг үүсгэсэн захирамж гаргасан байна лээ. Захирамжтай холбогдуулан шүүхийн урьдаас гарах шийдвэрийн биелэлтийг баталгаажуулах зорилгоор миний эд хөрөнгөтэй холбоотой битүүмжлэл гаргах захирамж гаргасан. Надад нэг тэрбум төгрөг ч байхгүй. Хэвлэлээр мушгисан мэдээлэл цацагдаж байна. Би шүүгчийн гаргасан шийдвэрт гомдол гаргаж, маргааш 14.00 цагт хэлэлцэнэ. Би хэн нэг хүнээс уучлал гуйх шаардлагагүй. Яагаад гэвэл Улаанбаатар хотын замын хөдөлгөөний нөхцөл байдал ямар байгааг та бүхэн сайн мэднэ. Жилдээ 130-140 мянган автомашин импортоор орж ирж байна. Хотын зам дээр 80 мянган машин зорчих боломжтой ч 10 дахин их машин зорчиж байна.

Машин импортлогчдын хувьд татвар төлдөггүй, Монголын чанар стандарт хангахгүй машин оруулж ирдэг, нүүрсэн яндангүй машин оруулдаг, хотын машины дугаар олгохыг зогсоосонтой холбоотой улсын дугаарын бизнес цэцэглүүлж байна.

Тиймээс би өнөөдөр АТГ-т бичиг хүргүүлээд ирлээ. Тэр бичиг нь хотын замын хөдөлгөөнд оролцохдоо автомашины үзлэг оношилгоонд ороогүй олон тооны улсын дугаарууд хаанаас гарч ирж байна вэ. Өөрөөр хэлбэл, машины улсын дугаар авахад заавал татвараа төлж, үзлэгт хамрагдаж, даатгал хийлгэсэн байх ёстой. Энэ асуудалд Авто тээврийн үндэсний төв болон авто тээврийн оношилгооны төвүүдийг хүчингүй болсон дугааруудыг сэргээж, шагийн бизнес эрхэлж байна уу гэж хардаж байна. Бас тодорхой баримтын дагуу хуулийн байгууллагаар шалгуулах хүсэлтийг тавьсан. Шинээр машин худалдан авахад хориглохгүй. Улаанбаатар хотоос улсын дугаараа хасуулж байгаа дугаарыг шинэ машинд зүүхийг хязгаарлана. Бид хоёр жилийн хугацаанд Туулын хурдны замаа барьж, түгжрэлийг бууруулахаар зорьж байна. Хоёр жилийн дараа НИТХ хотын түгжрэл буурсан тохиолдолд хотын машины улсын дугаарыг хэвийн байдалд шилжүүлэхээр хууль баталсан шүү дээ. Нийслэлийн сайт дээр такси үйлчилгээ явуулах гэж байгаа талаар мэдээлэл цацаагүй. Түгжрэлийн хуулийн дагуу Нийтийн тээврийн санг бий болгосон. Энэ сангийн зориулалт нь масс тээврийн хэрэгсэл буюу автобусыг худалдан авахад зориулна. Цаашид такси үйлчилгээг соёлтой болгох үүднээс хуульд өөрчлөлт оруулахаар судалж байна. Хэн нэг компанийн захирал хувийн ашиг сонирхлын үүднээс юу ч гэж жиргэж болно шүү дээ.

Намайг ченжүүд жил гаруй шантаажилж, доромжилж байгаа. Бид асуудлаа шийдэхийн тулд бодит үнэнтэй нүүр тулах цаг болсон.

Сая цагаан сараар "Дархан-Улаанбаатар хооронд вагоноор явж, алхаж хэвшье" гэсэн чинь монголчуудыг залхуу гэж хэллээ гэж гуйвуулсан. Бид дөрөвдүгээр сарын сүүлчээр агаарын бүсчлэл тогтоож, яндангаас татгалзаж байгаа айлуудад хийн болон цахилгаан зуухуудыг суурилуулъя. Тэгээд сар бүр урамшуулал олгоё гэж ярьж байна. Нөгөө түлшээ яриад байвал агаарын бохирдлын асуудлыг шийдэхгүй. Хийн халаагуурын тухайд 80 м.кв талбайгаас дээш, доош болон 50 м.кв талбайгаас доош гэсэн хэмжээ тогтоож, туршилт хийж үзсэн. Тухайлбал, 80 м.кв талбайгаас дээш хэмжээтэй байшинд сард ойролцоогоор 200 гаруй мянган төгрөгийн хий хэрэглэж байна гэж тооцоолсон. Харин түүнээс доош хэмжээтэй айлд 150 мянган төгрөгийн тооцоо гарч байна. Энд цэвэр дулаалгын асуудлыг шийдэх ёстой. Дулаалгаа шийдсэн айлд 100 мянган төгрөгийн урамшуулал олгоно. Тогны үнэ нэмэгдсэн нь надтай хамаагүй. Цахилгаан халаагуур нь хамгийн дэвшилтэт технологи байх юм. Туршилтыг бас хийсэн. Эцсийн үр дүн нь дөрөвдүгээр сард гарч, Засгийн газарт танилцуулна. Айл өрхүүдийг шилжүүлэхэд Засгийн газрын бүх гишүүдийг татан оролцуулах ёстой. Тиймээс бүсчлэл болон дээр яам агентлагуудыг оролцуулж, айл өрхүүдийн дулаалгын төслийг хэрэгжүүлж, суурилж, ашиглах нэгдсэн байдлаар танилцуулахаар бэлдэж байна. Өнгөрсөн амралтын өдөр Штабын хурал дээр журмын ерөнхий танилцуулгыг хийсэн. Одоо хэрхэн зохион байгуулах аргачлалын талаар Засгийн газрын тогтоол гаргуулахаар бэлдэж байна" гэв.

Мөн тэрбээр "Нийслэлийн төсөв дээр хэд хэдэн томоохон төслүүдийн ТЭЗҮ батлагдсантай холбоотойгоор тухайн ТЭЗҮ дээр дурдагдсан дүнгээр  нь тодотголыг зайлшгүй бичих ёстой.  Төрийн худалдан авах ажиллагааны үндсэн зарчимд аль нэг төсөв дээр тухайн төслийн төсвийг тавьдаг. Энэ тодотголын ажлыг хийх байх. Одоогоор нийслэлийн орлогын бүрдэл хэвийн урьдынхаараа явж байна.

Хэн ч юу ч гэж ярьж болно. Нийт 170 цагаас дээш ажиллаж байгаа автобусны жолооч 5-6 сая төгрөгийн цалин авч байна.

Үндсэн нормоороо ажиллаж байгаа автобусны жолооч 3.5 саяас дээш цалин авч байгаа. Энэ хүмүүс тэтгэвэрт гарвал өндөр цалин авч байгаа учраас 24 сарын цалин буюу 100 гаруй сая төгрөгийн цалин нэг удаа олгож байгаа. Гэтэл сүүлийн үед 156 жолооч "дэмбээ" буюу бэлэн мөнгийг иргэдээс авч, хувьдаа ашигласан байсан. Иргэд том, жижиг хулгайг дэмжмээргүй байна. Хулгайг таслан зогсоож байж, нийтийн тээврийн салбар хөгжинө" гэсэн юм.