Хэрэглээний төлбөрүүдийг 2024-2027 онд үе шаттай тогтмол нэмэгдэнэ гэдгийг албаныхан мэдэгдээд буй. Мэдэгдээд зогсохгүй цахилгааны төлбөрөөс эхэлсэн төлбөрийн нэмэгдэл ирэх саруудад дулаан, халуун ус гэхчлэн үргэлжилнэ. Энэ нь бизнес эрхлэгчдэд маш хүнд нөхцөл үүсгэж байгаа төдийгүй төрөөс хараат байдал руу түлхэж байгаа хэлбэр гэдгийг хэлж байгаа юм. Бизнес эрхлэгчдийн төлөөлөл нэгэн иргэн өчигдөр цахим хуудастаа энэ талаар мэдээлсэн бөгөөд татвар, хураамж, хэрэглээний төлбөрийн зардлаас болж арга барж байгаагаа ярьсан. Тус иргэнтэй холбогдож бид мэдээллийг тодрууллаа.

Хувиараа бизнес эрхлэгч Г.АНХБАЯР: 

-Монгол Улсад бизнес эрхлэх, тэр дундаа хувиараа гарааны бизнес хийх маш хүндрэлтэй. Бид төрөөс юу ч гуйгаагүй. Татвар, хураамж, зохих зардлуудаа тогтмол төлөөд л явж байгаа. Гэтэл жилээс жилд татвар, хураамж, одоо бүр хэрэглээний олон зардлын төлбөрийг нэг дор хэт их нэмж байгаа нь бизнес эрхлэгчдээ төр огт дэмжихгүй гэдгийг шууд утгаар илтгэж байна. Манайх ам бүл долоо. Нөхөр бид хоёр таван хүүхдийнхээ төлөө аль, аль талдаа ажил, хөдөлмөрөө чадахаараа сайн хийгээд амьдралын төлөө зүтгэж байгаа залуу гэр бүл. Банкны зээлтэй, түрээсийн төлбөр төлдөг бусад бизнес эрхлэгчдийн л адил. Гэтэл төрийн шийдвэрээс болж банкны зээлээ ч төлөхөд хүндрэлтэй байдал руу шилжиж байна.

Манайх онлайн шоп ажиллуулдаг. Сар бүр банканд найман сая төгрөгийн зээл төлдөг. Мөн дэлгүүрийн түрээсийн төлбөрт сард дөрвөн сая төгрөг өгдөг. Өнгөрсөн оны арваннэгдүгээр сараас тогны мөнгө нэмэгдэж, сард 90 мянган төгрөг гардаг байснаас 250-270 мянган төгрөг гардаг болсон.

2023 оны дөрөвдүгээр сард анх онлайн шопоо нээж, шантрах олон асуудалтай тулгарч байсан. Тийм боловч банкны зээлтэй хүмүүст шантрах эрх байхгүй. Өнөөдөр бид ардчилсан улсад амьдарч байна, төрөөс бизнес эрхлэгчдээ дэмжиж байна гэж ярьдаг ч бодит амьдрал дээр эсрэгээрээ. Төр бизнес эрхлэгчдээ боломж биш юмаа гэхэд алхах, гишгэх, үйл ажиллагаагаа хэвийн явуулах эрхийг нь үлдээчих ёстой. Ядаж л зээлийн таатай нөхцөл бий болгож чаддаггүй юмаа гэхэд хэрэглээний зардлуудын төлбөрийг бага, багаар шат дараатай нэмэх хэрэгтэй. Сард 90 мянга гардаг байсны тогны мөнгөө бид гурав дахин нэмэгдэхэд юм хэлээгүй. Аж ахуй нэгжүүдийн төлбөр айл өрхөөс илүү нэмэгдэлтэй тооцогдож байгаа. За болъё гэхэд үнэ нэмээд, төлбөрөө өндөр аваад ямар бүтээн байгуулалт хийх гэж байгаа, хийж байгаагаа иргэдэд танилцуулах хэрэгтэй шүү дээ. Одоо ирэх тавдугаар сараас дулааны үнэ 85 хувиар нэмнэ гэж байгаа. Цахилгааны төлбөр нэмэгдэхэд ихэнх өргөн хэрэглээний бараа, бүтээгдэхүүний үнэ нэмсэн. Дулааны үнэ нэмэхээр дагаад л дахин үнэ өснө. Бизнес эрхлэгчдийн нуруун дээр ирэх ачаа улам л нэмэгдэж байна. Сүүлийн хоёр сар түрээсийн төлбөрөө төлж чадахгүйд хүрсэн. Гэсэн ч банкны зээлээ төлөхөөс өөр аргагүй учир нөхөртэйгөө хичээж ажиллаж байна. Цаашид хэрэглээний зардлуудаа ч яаж төлөхөө мэдэхгүй байна. Төр бизнес эрхлэгчдээ үнэхээр л дэмжмээр байгаа бол чөдөр болохгүйгээр зээлийн таатай нөхцөл бүрдүүлж, уян хатан бодлого хэрэгжүүлэх шаардлагатай.