Засгийн газар өнгөрсөн оны арваннэгдүгээр сард Эрчим хүчний зохицуулах хорооноос гаргасан тарифын дагуу цахилгааны үнийг нэмсэн. Ингэхдээ аж ахуй нэгжийн цахилгааны үнийг 30 хувиар, айл өрхийн хэрэглээг 30-85 хувиар гурван шатлалтай нэмсэн билээ. Цаашид ч дулаан болон халуун, хүйтэн усны төлбөрийг нэмнэ гэдгийг албаныхан мэдээлсэн. Ирэх саруудад нэмэх татвар, хураамжийн тухайд мөн л аж ахуй нэгжүүдийг тусгай бүлэгт хамруулж, айл өрхөөс илүү өндөр дүнгээр төлбөрийг тооцох шатлал гаргасан. Бизнес эрхлэгчдийн зүгээс татварын дарамтад орж, нийгмийн даатгалын шимтгэлээ ч төлж чадахгүй байгаа энэ хүнд үед хэрэглээний төлбөрийг хэт өндөр болгож байгаа нь шууд утгаараа төр бизнес эрхлэгчдийг дампууруулахыг завдаж байна гэдгийг илэрхийлж байгаа. Энэ талаар эдийн засагчдын байр суурийг тодрууллаа.

"ХЭРЭГЛЭЭНИЙ ТӨЛБӨР НЭМЭГДЭХ НЬ ЭДИЙН ЗАСГИЙН ӨСӨЛТӨД СӨРӨГ НӨЛӨӨТЭЙ"

Эдийн засагч Д.АМГАЛАН:

-Эдийн засагт ард иргэд төдийгүй аж ахуй нэгжүүдэд хүндрэл тулгарах төлөвтэй байна. Тухайлбал, хөдөлмөрийн хөлсний доод хэмжээ ирэх дөрөвдүгээр сарын 1-нээс 792 мянган төгрөг болно. Ингэснээр иргэд, аж ахуй нэгжийн нийгмийн даатгалын шимтгэлд төлөх төлбөрийн дарамт ачаалал нэмэгдэнэ гэсэн үг.

Мөн ус, дулааны үнийн нэмэгдэл нь аж ахуй нэгж, бизнесийнхний үйл ажиллагааны зардал болоод суурь зардал өсөх нөхцөлийг бий болгож байна. Энэ нь ашигт ажиллагаанд шууд нөлөөлнө.

Цаашилбал хэрэглээний төлбөрийн нэмэгдэл, бараа, бүтээгдэхүүний үнийн өсөлт аж ахуй нэгжүүдэд зардлаа дааж явахад хүртэл нөлөөлнө. Үүгээр ч зогсохгүй санхүүгийн энэ хүндрэл нөлөөллөөс үүдэн байгууллагууд, бизнес эрхлэгчид ажиллах хүчээ цомхотгох, халах, цалин хөлсөө бууруулах зэрэг сөрөг байдлууд гарах эрсдэлтэй. Татвар, хураамж нэмэгдэнэ гэдэг бол бараа бүтээгдэхүүний үнийн өсөлтийг бий болгоно. Ингэснээр нийт эдийн засгийн өсөлтөд сөрөг нөлөөллийг авч ирж таарна.

"НЭГ БОЛ ИНФЛЯЦИ НӨГӨӨ БОЛ АЖИЛГҮЙЧҮҮДИЙН ТОО ӨСНӨ" 

Эдийн засагч Б.СОСОРБАРАМ:

-Татварын дарамт, ирэх саруудад нэмэх дулаан, усны мөнгөний нэмэгдлийг ерөнхийд нь харвал үйл ажиллагааны зардал нэмэгдэж, аж ахуй нэгжүүдийн хувьд энэхүү зардлыг хэрхэн одоогийн үйлдвэрийн хүчин чадлын хувьд нөхөх вэ гэдэг сонголтод ирнэ.

Аж ахуй нэгжүүд нэгдүгээрт, бүтээгдэхүүн, үйлчилгээний үнийг нэмэх замаар үйл ажиллагааны зардлыг өсөлтийг нөхөх. Хоёрдугаарт, ажилчдын тоог бууруулж үйл ажиллагааны зардлыг бууруулах, бүтээмжийг нэмэгдүүлэхэд анхаарч ажиллах.

Дээрх хоёр сонголтын алийг нь хийсэн ч эдийн засагт учрах сөрөг үр дагавар ихтэй. Хэрэв аж ахуй нэгжүүд үйл ажиллагааны зардлын өсөлтийг бүтээгдэхүүн, үйлчилгээний үнийг нэмэгдүүлэх замаар нөхөх бол инфляц нэмэгдэнэ. Нөгөө талаас ажилчдын тоог бууруулах шийдвэр гаргавал ажилгүйчүүдийн тоо нэмэгдэх эрсдэлтэй.