Москва хотын бүс нутагт нэг шөнийн дотор их хэмжээний дроны халдлага болж, наад зах нь нэг хүн амиа алдаж, гурван хүн шархаджээ. Бүс нутгийн амбан захирагч Андрей Воробьевийн хэлснээр, хохирогчид нийслэлээс холгүй орших Видное, Домодедовод халдлагад өртсөн бөгөөд долоон орон сууцны барилга сүйрсэн байна.

Хотын дарга Сергей Собянин хэлэхдээ, Москва хотын зүгт чиглэж байсан 73 дроныг устгасан бөгөөд хэлтэрхий ч орон сууцны барилгын дээвэр дээр унаж байжээ. Халдлагын дараа бүтэн нэг дүүргийн галт тэрэгний сүлжээ түр тасарсан бөгөөд Москва хотын нисэх онгоцны буудлын үйл ажиллагааг хязгаарлах арга хэмжээ авчээ. Энэхүү халдлага нь Орос, Украины дайныг зогсоох асуудлаар Саудын Арабт болох АНУ, Украины төлөөлөгчдийн уулзалтаас хэдхэн цагийн өмнө болсон байна. Амбан захирагч Воробьев олон нийтийн сүлжээнд Москва мужийн эвдэрсэн орон сууц, шатсан машинуудын зургийг нийтэлж, халдлагын дараа 12 хүнийг, нэн ялангуяа гурван хүүхдийг эвдэрч гэмтсэн орон гэрээс нь нүүлгэн шилжүүлэх шаардлага гарсан гэж мэдэгдсэн байна.

Түүнчлэн, Оросын Батлан ​​хамгаалах яам Украины 337 дроныг Москва болон Оросын бусад есөн бүс нутагт нэг шөнийн дотор халдлага үйлдэх гэж байхад нь устгасан гэж мэдэгдэв.

Украины зүгээс уг халдлагатай холбоотой ямар нэгэн тайлбар хийгээгүй байгаа юм. Харин шөнийн цагаар Оросын дронууд Киев болон бусад хэд хэдэн бүс нутагт халддаг гэж шүүмжилжээ.