Цагаан ордны Зууван танхимд өнгөрсөн сарын 28-ны өдөр болсон Трамп, Зеленский, Ж.Д.Вэнс нарын уулзалт одоо хүртэл олны ярианы сэдэв хэвээр байна. Тухайн үед Зеленскийг жижигрүүлсэн гэж дэд ерөнхийлөгч Ж.Д.Вэнсийг үеэл нь зэмлэжээ.

Түүний үеэл Нэйт Вэнс хэлэхдээ "Би улс төрийн удирдагчдыг камерын өмнө тодорхой хэмжээнд эелдэг байгаасай гэж хүсдэг. Трамп, Вэнс нар Цагаан ордонд болсон уулзалтыг тиймхэн байдлаар өрнүүлсэн нь таагүй санагдаж байна. Цагаан ордны албан тушаалтнууд болон сэтгүүлчид үүнээс өөр асуудал дээр гадаадын удирдагчийг ийм байдлаар жижигрүүлсэн бол ямар чөтгөр нь болоод байна аа л гэж би хэлэх байсан" гэжээ.

Нэйт Вэнс нь Оросын түрэмгийлэл эхэлснээс хойш Украины армид гурван жилийн турш сайн дураар хүчин зүтгэсэн нэгэн. Тэрбээр өмнө нь ч бас Трамп, Ж.Д.Вэнс нарыг мөргөлдөөнийг зохицуулахын тулд Путины төлөө ажиллаж байгаа тэнэгүүд гэж шүүмжилж байсан удаатай.

Зууван танхимын уулзалтыг дэлхий нийт одоо ч мартаагүй. Тухайн үед Трамп дэлхийн гуравдугаар дайнаар мөрийтэй тоглосон гэж Зеленскийг буруутгасан. Мөн хэлэлцээ хийхгүй бол тусламжаа эргүүлэн татна гэж заналхийлсэн билээ. Харин дэд ерөнхийлөгч Ж.Д.Вэнсийн хувьд Зеленскийг талархал илэрхийлж мэддэггүй гэж буруутгаад хэвлэлийнхний өмнө маргааныг шүүхийг завдан хүндэтгэлгүй байдал гаргалаа гэжээ.

Зеленский талархал илэрхийлдэггүй гэх үгийг Нэйт Вэнс няцаажээ. Тэрбээр "Зеленский Украиныг дэмжиж буй хэн бүхэнд өдөр шөнөгүй л талархал илэрхийлдэг. Зеленский АНУ-ын ерөнхийлөгчид хангалттай хүндэтгэл үзүүлээгүй байж болно. Гэхдээ сүүлийн гурван жилийн турш Зеленскийн гаргасан санаачлага бүрийн эсрэг идэвхтэй ажилласан хүмүүсийн хувьд Трамп, Вэнс нар хүндэтгэл хүсэх нь утгагүй" гэж хэлсэн юм.

Үл ойлголцол хэсэг хугацаанд үргэлжилсний эцэст Зеленский Цагаан ордноос явахыг хүсч, төлөвлөгдсөн байсан хэвлэлийн бага хурал ч болоогүй. Ингээд уулзалтын дараа Трамп АНУ-ын цэргийн тусламжийг зогсоож, Украинтай хиймэл дагуул, тагнуулын мэдээлэл солилцохгүй гэсэн шийдвэрээ зарласан.

Зеленскийг албан бус хувцастай Цагаан ордонд орж ирсэн гэж шүүмжилснийг ч бас Нэйт Вэнс өмөөрчээ. Тэрбээр "Тэр яагаад албан бус хувцастай ирснийг хүн бүр ойлгож байгаа. Энэ бол бэлгэдлийн чанартай зүйл. Хэнд хамаатай юм бэ? Ялихгүй зүйлийг томруулж байна. Тэгж ярьвал Элон Маск яагаад Зууван танхимд бэйсболын малгайтай, подволктой дандаа байж байдаг юм?" гэжээ.

Ж.Д.Вэнс сайн залуу боловч түүний Зеленскийтэй хийсэн уулзалт "Жинхэнэ отолт, урхи" байлаа гэж Нэйт Вэнс хэлжээ.