Элон Маскийн "Х" платформ Даваа гаригт хоёр ч удаа доголдсон нь АНУ, Их Британи дахь олон мянган хэрэглэгчид нөлөөлөв. Цахим хуудсуудын доголдлыг хянадаг "Downdetector"-т мэдээлснээр эхний тасалдал 45 минут үргэлжилсний эцэст Номхон далайн цагаар 02:30 цагийн үед хэвийн болжээ. АНУ-аас 21 мянган хэрэглэгч, Их Британиас 10800 хэрэглэгч платформын доголдлын талаар "Downdetector"-т мэдээлжээ.

Хоёр дахь доголдол Номхон далайн цагаар 06:45 цагийн үед болжээ. Мөн л өмнөх доголдлын адилаар 45 минутын дараа хэвийн байдалдаа орсон боловч хэдэн хормын дараа дахин тасалдсан. Энэ доголдлын талаар 8000 гаруй хэрэглэгч "Downdetector"-т мэдээлжээ.

Хоёр удаагийн доголдлын дараа Элон Маск "Х" хуудсандаа тайлбар хийжээ. Тэрбээр "Х платформын эсрэг томоохон кибер халдлага хийсээр л байна. Бидэн рүү өдөр бүр л халддаг. Гэхдээ энэ удаагийн халдлагад ихээхэн хөрөнгө мөнгө зарцуулжээ. Томоохон зохион байгуулалттай бүлгэм, эсвэл аль нэг улс оролцсон байна. Яг юу болсныг бид хараахан бүрэн тодруулаагүй байна. Гэхдээ халдлагыг Украин дахь IP хаягнаас үйлдсэн байсан" гэжээ.

Дашрамд дурдахад, "Х" хамгийн сүүлд 2024 оны наймдугаар сард томоохон доголдсон бөгөөд нийт хэрэглэгчийн 66 хувь нь нөлөөлөлд автсан. Үүнээс өмнө 2023 оны долдугаар сар, 2024 оны гуравдугаар сард тус тус доголдож байжээ.