АНУ-ын ерөнхийлөгчөөр Дональд Трамп дахин сонгогдсоноор Украинд үзүүлэх тусламжуудыг зогсоож, тагнуулын мэдээлэл хуваалцахаа больсон. Энэ нь дайн эхэлснээс хойш АНУ-ын дэмжлэгт ихээхэн түшиглэж байсан Украины хувьд хүндхэн сорилт болоод буй. Тэгвэл Трампийн шийдвэрээс үл хамааран Украинаас нүүр буруулаагүй үлдсэн ямар ямар улс байгааг энэхүү нийтлэлээр онцолж байна.

Юун түрүүнд Европын холбоог нэрлэж байна. Европын холбоо тивийн батлан хамгаалах салбарыг хөгжүүлэх, цэргийн чадавхийг нэмэгдүүлэх таван хэсгээс бүрдсэн төлөвлөгөө гаргажээ. “Европыг дахин зэвсэглэх нь” төлөвлөгөөний хүрээнд Европын батлан хамгаалахын зардлыг 800 тэрбум евро хүргэхийн зэрэгцээ Украинд үргэлжлүүлэн дэмжлэг үзүүлнэ.

800 тэрбумын зорилгодоо хүрэхийн тулд Европын холбоо:

• Төсвийн дүрэм журмыг зөөлрүүлэх замаар гишүүн орнууд батлан ​​хамгаалах салбартаа илүү их мөнгө зарцуулахыг нь зөвшөөрнө.
• Цэрэг армидаа хөрөнгө оруулахад нь туслах зорилгоор улс орнуудад 150 тэрбум еврогийн зээл олгоно.
• Хувийн компаниудыг батлан ​​хамгаалахын төсөлд хөрөнгө оруулахыг дэмжинэ.

Гишүүн орнууд цэрэг армидаа хөрөнгө оруулалт хийснээр Украинд үзүүлэх дэмжлэгээ эрс нэмэгдүүлэх боломжтой гэж үзэж байна.

"Хэрэв гишүүн орнууд батлан ​​хамгаалах зардлаа дунджаар дотоодын нийт бүтээгдэхүүний 1.5 хувиар нэмэгдүүлбэл дөрвөн жилийн хугацаанд ойролцоогоор 650 тэрбум еврогийн санхүүгийн орон зай бий болно" гэж Европын комиссын тэргүүн Урсула фон дер Лейен хэлжээ. Одоогоор Европын холбооны цөөнгүй орны батлан ​​хамгаалах зардал нь НАТО-гийн дотоодын нийт бүтээгдэхүүний хоёр хувиас доогуур байна.

800 тэрбумын зорилгоос гадна Европын холбооны гишүүн хэд хэдэн орон тусдаа Украинд 15 тэрбум евро буюу 16.3 тэрбум ам.долларын нэмэлт тусламж үзүүлэхээ амласныг Европын зөвлөлийн дарга Антонио Коста гуравдугаар сарын 6-нд болсон дээд хэмжээний уулзалтын үеэр мэдэгдэв. Гэхдээ чухам аль аль улс гэдгийг Коста зарлаагүй байна.

Хоёрдугаарт, Норвеги улс 2025 онд өөрийн батлан хамгаалахын зардлаа өсгөхийн хажуугаар Украинд үзүүлэх цэргийн тусламжаа хоёр дахин нэмэгдүүлж, 7.8 тэрбум ам.доллар болгохоо амлаад байна. Энэ талаар тус улсын ерөнхий сайд өнгөрсөн Пүрэв гаригт мэдэгдсэн бөгөөд Норвегийг сүүлийн 80 жилд тохиогоогүй ноцтой үетэй тулгараад буйг онцолсон юм. Баялгийн сангийн хэмжээгээрээ дэлхийд тэргүүлдэг Норвеги улс Украины санхүүжилтыг өнгөрсөн оны арваннэгдүгээр сард 35 тэрбум норвеги крон байна гэж төлөвлөсөн боловч үүнийгээ 85 тэрбум крон буюу 7.8 тэрбум ам.долар болгосон аж.

Норвеги улс Европын холбоонд нэгдээгүй боловч НАТО-гийн нэг хэсэг юм.

Украинд үзүүлэх тусламжийг нэмэгдүүлэх санааг тус улсын парламентын гишүүд дэмжиж байна. Тухайлбал, тус улсын сөрөг хүчний Батькивщина намын Володимир Кабаченко энэ алхмыг сайшааж буйгаа илэрхийлээд, "Хэрвээ Норвеги улс иргэдийнхээ амь насыг хамгаалахыг хүсвэл тэдний хийх цорын ганц зөв зүйл нь Украинд мөнгө өгөх явдал" гэжээ.

Гуравдугаарт, Франц улс Оросын хөрөнгийн хүүг ашиглан Украинд дахин 195 сая еврогийн зэвсгийн тусламж үзүүлэх болжээ. Энэ мөнгийг Францаас Украинд өгсөн "Мираж 2000" сөнөөгч онгоцонд 155 мм-ийн их бууны сум, гулсмал бөмбөг хийхэд ашиглана. Францын Батлан хамгаалахын сайд Себастьян Лекорну энэ талаар ярилцлага өгөхдөө "AMX-10RC" зэрэг зарим хуучин хуягт байлдааны машинуудаа Украинд өгөхөөр төлөвлөж байна гэв.

Дөрөвдүгээрт, Скандинавын болон Балтийн орнууд Украинд үзүүлэх цэргийн тусламжаа нэмэгдүүлэхээ өнгөрсөн сард амласан. Тодруулбал, дайны гурван жилийн ойн өдөр Скандинавын болон Балтийн орнуудын удирдагчид Киевт айлчилж, Украиныг дэмжиж байгаагаа дахин илэрхийлсэн. Энэ үеэр Финланд, Латви, Литва, Дани, Эстони, Исланд, Норвеги, Шведийн ерөнхий сайд нар Украины ерөнхийлөгч Зеленскийтэй хамтарсан мэдэгдэл хийжээ. "Дайн Европын болон Атлантын далай дамнасан аюулгүй байдалд урт хугацааны нөлөө үзүүлнэ" гэж тэд мэдэгдсэн. Мөн Украинд тоног төхөөрөмж, сургалтын тусламж үзүүлнэ гэв.

Хамтарсан мэдэгдлээс гадна Дани улс тусдаа Украинд 280 сая ам.долларын цэргийн тусламж үзүүлэхээ амлажээ. Үүнийхээ дараа хүмүүнлэгийн тусламж болон сэргээн босголтын ажилд 37 сая ам.доллар зарцуулах нэмэлт амлалт өгчээ.

Харин Шведийн засгийн газар Украинд агаарын довтолгооноос хамгаалах систем, тэр дундаа Шведэд үйлдвэрлэсэн "RBS 70", "Tridon Mk2" зэргийг худалдан авахад зориулж 1.2 тэрбум швед крон буюу 113 сая ам.долларын тусламж амлаж байгаагаа зарлав.