Өмнөд Солонгосын ерөнхийлөгч Юн Сук Ёлыг цагдан хорих төвөөс суллах шийдвэр саяхан гарсан. Ерөнхий прокурор Шим Вү Жунг “Юныг шүүх хурлын үеэр цагдан хорьсон нь хууль бус үйлдэл” гэжээ. Мөн цагдан хорих төвөөс суллах шийдвэр нь Юны эсрэг хэрэг улс төрийн зорилготой, хууль зүйн үндэслэлгүй байсныг харуулна гэв.

Юн Сук Ёл суллагдсан ч гэлээ эрх мэдлийг нь түдгэлзүүлсэн хэвээр байгаа билээ. Эцсийн шийдвэрийг Үндсэн хуулийн цэц ойрын өдрүүдэд гаргана. Хэрвээ Үндсэн хуулийн цэц импичментийг дэмжвэл дараагийн ерөнхийлөгчийг 60 хоногийн дотор сонгох ёстой. Юн хэлэхдээ “Төрийн эсрэг элементүүдийг устгахын тулд цэргийн онц байдал зарлах шаардлагатай байсан” гэжээ.

Юныг цагдан хорих байрнаас гарахад дэмжигчид нь угтаж авсан.

Үндсэн хуулийн цэцийн шийдвэр гарах дөхсөн тул Юныг дэмжигчид болон эсэргүүцэгчид гээд олон мянган хүн жагсч, цуглах төлөвтэй байна. Тиймээс энэ үеэр аюулгүй байдлын үүднээс цагдаа нар өндөржүүлсэн бэлэн байдалд ажиллаж, метроны буудал, сургууль зэргийг хаах магадлалтай байна. “Бид хамгийн муу хувилбаруудыг тооцоолон төлөвлөгөө боловсруулж байна” гэж Үндэсний цагдаагийн газрын ерөнхий комиссарын үүрэг гүйцэтгэгч Ли Хо Ён хэллээ. Мөн Сөүл хотын Боловсролын газраас зарим сургуульд аюулгүй байдлын арга хэмжээ авахыг зөвлөсөн захидал илгээжээ.