Thorin: "The MongolZ" цэнгэлдэхэд тоглох учраа олчихвол олон баг хэцүүднэ

Цахим спортын "CS2" төрлийн энэ оны эхний томоохон тэмцээнүүдийн нэг болох "ESL Pro League"-ийн 21 дэх улирал Шведийн Стокхольм хотноо үргэлжилж байна. 400 мянган ам.долларын шагналын сантай тус тэмцээнд Монголын шигшээ баг болсон "The MongolZ" оролцож буй. Өчигдөр/2025.03.09/ тэд тэмцээний гурав дахь тоглолтоо дэлхийн тэргүүн баг Оросын "Spirit" багийн эсрэг хийж, 0-2 гэсэн харьцаатай хожигдсон юм. "Anubis" болон "Dust2" дээр болсон тоглолтуудад Оросын багаас "donk" сайн тоглож, багаа манлайлав.

Тоглолтын дараа "Spirit"-ийн "zont1x" ярихдаа "Dust2 дээр хоёрдугаар хагаст тэд бидний шандасыг сорилоо. Үнэхээр хэцүү тоглолт боллоо. Гэхдээ эцэст нь бид яллаа. Одоо бидэнд нэг өдөр амрах зай гарлаа. Бэлтгэлээ хийж, өмнөх тоглолтуудаа дүгнэх болно" гэжээ.

"Spirit" болон "The MongolZ" багууд анх удаагаа "dust2" дээр тоглосон нь энэ байлаа.

"Spirit"-ийн хувьд Монголын багийг "Mirage" мапыг сонгоно гэж бодож байжээ. Гэвч тэд "Anubis" сонгож тоглосон юм. Энэ талаар "zont1x" ярихдаа "Хэрэв тоон үзүүлэлт харвал ‘Аnubis’ бидний хамгийн муу мап. Бид уг нь ‘Mirage’ хүлээж байсан юм. Гэхдээ бид аргыг нь олсон" гэжээ.

"Spirit" баг гурван хожил байгуулсанаар плей-оффын эрхээ авсан бол "The MongolZ" анхны хожигдлоо амсч, 2-1 гэсэн амжилттайгаар өнөөдөр дахин плей-оффын эрхийн төлөө тоглоно.

"The MongolZ"-ийн өнөөдрийн учраа нь Францын "3DMAX" баг. Хоёр багийн тоглолт 20:30 цагаас эхлэх хуваарьтай. Хурдтай тоглолттой Францын баг өчигдөр нутгийн ах нар болох "Vitality"-д хожигдсон.

"The MongolZ", "3DMAX" багууд нийт дөрвөн удаа учраа таарахад 2:2 гэсэн харьцаатай байна. Эхний хоёр учраанд франц баг илүүрхсэн бол сүүлийн хоёр тоглолтод Монголын баг учрыг нь олжээ.

Британийн аналист, сэтгүүлч, "Цахим спортын түүхч" гэдгээрээ алдартай Данкан Шилдс буюу "Thorin" өөрийн твиттер хуудаснаа "Senzu болон MongolZ цэнгэлдэхэд тоглох учраа олчихвол олон багийн төгсгөл ирнэ дээ" гэж жиргэжээ.