Олон улсын эмэгтэйчүүдийн эрхийн хамгаалах өдрөөр Оросын засгийн газар Украинд тулалдаж буй цэргүүдийн ээж, эхнэр, охидод нь цэцэг, мэндчилгээний захидал бэлэглэсэн байна. Мөн дайны талбарт нас барсан цэргийн гэр бүлд бэлэг илгээжээ. Тухайлбал, эмэгтэйчүүдийн ажил, нийгэмд оруулсан хувь нэмрийг анхаарч, үнэлэхийн оронд хүү төрүүлж, цэрэгт явуулсанд нь талархал илэрхийлж буй мэт утга бүхий мэндчилгээ дэвшүүлж, бэлэг өгсөн байна. 40 гаруй бүс нутагт энэхүү үйл ажиллагаа явагдсан бөгөөд зарим хотын дарга нар биечлэн талархлын бэлгийг тарааж, эмэгтэй цэргийн алба хаагчийн эрх үүргийг онцлон тэмдэглэж байсан гэж орон нутгийн хэвлэлүүд онцлов.

Гэхдээ уг бэлэг нь мужаасаа хамаарч өөр, өөр байх аж. Зарим газарт бэлэн мөнгө, цэцэг зэргийг бэлэглэсэн бол хайрцагтай цай, концерт үзэх тасалбар болон цэргүүд ээж нарыгаа магтан дуулж буй видео бичлэг илгээжээ.

Түүнчлэн, хөгжлийн бэрхшээлтэй хүүхдүүд армийн алба хаагч болон ар гэрийнхэнд зориулсан мэндчилгээний карт хийж, үүнийг нь нэгдсэн журмаар тараажээ. Ажиглагчдын үзэж буйгаар эмэгтэйчүүдийн баярыг тэмдэглэх арга хэмжээг ийнхүү өөрчилсөн нь Оросын уламжлалт үнэт зүйлсийг сурталчлах, дайныг дэмжих хүчин чармайлтын нэг хэсэг аж. Мөн зарим шүүмжлэгчид амиа алдсан хүүдээ гашуудаж буй ээж, нөхрөө хүлээх эхнэр, цэргийн алба хааж буй эмэгтэйчүүд зэрэг өөр өөр амьдрал, статустай эмэгтэйчүүдийг зөвхөн дайнд дэмжлэг үзүүлж байгаагаар харуулж байна гэж буруутгажээ.