Дэлхийн хамгийн нууцлаг бөгөөд тусгаарлагдмал Хойд Солонгос улс таван жилийн дараа сая нэг хилээ нээж, барууны анхны зочдоо хүлээн авсан билээ. Гэвч хэдхэн долоо хоног нээсний эцэст тэд дахин хилээ хаав.

Хойд Солонгос 2020 оны эхээр буюу Covid-19 цар тахлын эхэн үед хилээ хааж, 2023 оны дунд үеэс эхлэн хязгаарлалтыг аажмаар цуцалсан. Улмаар 2024 оны хоёрдугаар сард орос жуулчдыг анх удаа хүлээн авсан билээ. Харин Их Британи, Канад, Франц, Герман зэрэг бусад орноос ирсэн жуулчид өнгөрсөн сард Хойд Солонгост зочилжээ.

Барууныхны аялал Хойд Солонгосын засгийн газраас эдийн засгийн тусгай бүс гэж нэрлэсэн зүүн хойд Расон хотоор л хязгаарлагдаж байв. Аяллын хүрээнд тэд Хойд Солонгосын талийгаач удирдагчдын хөшөөнүүд болон дэлгүүр, үйлдвэрээр зочилжээ. Оросуудаас ялгаатай нь тэднийг нийслэл Пёньянд зочлохыг хориглосон.

Дараагийн мэдэгдэл гартал Хойд Солонгос руу аялах боломжгүй боллоо гэсэн мэдээг аяллын компаниуд Лхагва гаригт гаргажээ. Үүний учир шалтгаан болон үргэлжлэх хугацаа тодорхойгүй байна. Иймд дөрөв, тавдугаар сард аялал төлөвлөсөн байсан хүмүүст түр азнах зөвлөмжийг хүргэж байгаа аж. Өмнө нь захиалчихсан байсан аяллын төлбөрийг буцаан олгох боломжтой гэж Хятадад төвтэй "Young Pioneer Tours" мэдэгджээ.

Хойд Солонгос улс 1991 онд Расоныг эдийн засгийн онцгой бүс гэж зарласан. Энэ хүрээнд тус бүс нутагт бусдаас өөр үйл ажиллагаа явуулж иржээ. Тухайлбал, зөвхөн Расонд зориулсан эдийн засгийн бодлого хэрэгжүүлж, гар утасны сүлжээ, картын төлбөрийн систем зэргийг туршилтаар нэвтрүүлсэн юм.

Цар тахлын өмнө Хойд Солонгос улс хятад жуулчдыг олноор хүлээж авдаг байжээ. Тухайлбал, 2019 онд л гэхэд 175 сая ам.долларын ашигийг аялал жуулчлалаас олсон байна. Харин 2024 онд Хойд Солонгост очсон орос жуулчдын тоо 900 дөхжээ.

Дашрамд дурдахад, америк оюутан Отто Уормбиерын хэргээс болж 2017 онд АНУ иргэдээ Хойд Солонгост зорчихыг хориглосон байдаг. Виржиниагийн их сургуулийн оюутан, 22 настай Уормбиер 2016 оны нэгдүгээр сард Пёньянд айлчлах үеэрээ зочид буудлаас суртал ухуулгын баннер хулгайлсан аж. Энэ үйлдлийнхээ төлөө тэр 15 жил хүнд хөдөлмөр эрхлэх ял авсан. Гэвч ял авснаас нь хойш нэг жилийн дараа түүнийг ухаангүй байдалтай АНУ руу буцаасан бөгөөд Уормбиер удалгүй нас баржээ.