Францын ерөнхийлөгч агсан Шарль де Голль нэгэн цагт "Оросуудаас илүү америкчууд бидний найз. Гэхдээ Америкт ч бас ашиг сонирхол бий. Тиймээс нэг л өдөр тэдний эрх ашиг манайхтай зөрчилдөнө" гэж хэлж байв. Эцэст нь түүний зөв байжээ. Түүний сэрэмжлүүлэг өнөөгийн нөхцөл байдалд туйлын үнэн болж хувирч байна.

Франц улс хүчирхэг гүрнүүдийн нөлөөллөөс ангид байх ёстой гэсэн зарчимыг тэр баримталдаг байв. Энэ зарчимын дор Франц өөрийгөө хамгаалахын тулд цөмийн зэвсэгтэй байх ёстой гэсэн ойлголт анх гарсан.

Тэгвэл өдгөө энэ ойлголт Европын аюулгүй байдлын талаарх маргааны төвд ороод байна. Европ тивд цөмийн зэвсэгтэй хоёрхон орон байгаа нь Франц, Их Британи. Францын хувьд 300 хүрэхгүй цөмийн цэнэгт хошуутай бөгөөд эдгээрийг нисэх онгоц эсвэл шумбагч онгоцноос харвах боломжтой. Харин Их Британид 250 орчим цөмийн цэнэгт хошуу бий.

Хамгийн том ялгаа нь Францын цөмийн арсенал бүрэн бие даасан байдалтай бол Их Британийнх АНУ-ын техникийн дэмжлэгт тулгуурладаг.

Тэгвэл Францын ерөнхийлөгч Эммануэль Макрон Лхагва гаригт Францын таслан зогсоох хүч энэхүү тодорхой бус шинэ эрин үед Европын бусад орны хамгаалалттай холбогдож магадгүй гэсэн санааг дэвшүүлэв. Франц цөмийн арсеналаа бусадтай хуваалцаж магадгүй гэх энэ санаа баруун, зүүний үзэлтнүүдийн эгдүүцлийг төрүүлжээ. Харин засгийн газрын болон батлан хамгаалахын албан тушаалтнууд "Франц юуг ч хуваалцах ёсгүй" гэсэн байр суурийг баримталж байна.

Гэхдээ Европын зарим улс Францын цөмийн шүхэр дор хэзээнээсээ байсан гэсэн санааг Шарль де Голль дэвшүүлж байжээ. Тэрээр 1964 онд "ЗХУ Герман руу довтолсон тохиолдолд Франц үүнийг өөр лүү нь довтолсонтой ижил авч үзнэ" гэж хэлж байв.

Тиймээс Макроны хэлсэн санаа цоо шинэ зүйл биш. Харин Европын орнууд өөрсдөө үүнийг хүсч эхэлсэн нь шинэ зүйл ажээ. Өмнө нь Франц улс цөмийн хамгаалалтаа сунгах санал дэвшүүлэхэд тэд хариу өгөхөөс татгалздаг байв. Яагаад гэвэл тэд АНУ болон НАТО-д бүрэн итгэхгүй байгаа мэт харагдахыг хүсээгүй. Гэтэл Германы канцлер Фридрих Мерц өнгөрсөн сард энэ асуудлаар Франц, Их Британитай ярилцах мөч тохиож магадгүй гэж хэлсэн юм.

Батлан хамгаалахын шинжээчдийн таамаглаж буйгаар Францын бөмбөгдөгч онгоцууд өнөөдөр эх орныхоо хилийг тогтмол манадаг шигээ Европын хилийн эргүүл хийж болно. Эсвэл аливаа гэнэтийн тохиолдолд Францын бөмбөгдөгч онгоцуудыг яаралтай байрлуулж болохоор тооцож бусад оронд нисэх онгоцны буудлуудыг хөгжүүлж болно.

Өдгөө асуудал болж буй зүйл нь цөмийн цэнэгт хошууны тоо ширхэг. Францын 300 цэнэгт хошуу Оросын мянга мянган цөмийн цэнэгт хошууны эсрэг хангалттай юу? Үгүй л болов уу. Гэхдээ Их Британитай нэгдвэл 550 болно. Хоёрдугаарт, Францын цөмийн сургаалыг шинэчлэн боловсруулж, ашиг сонирхол нь Европын холбоотнуудыг ч мөн хамарна гэдгийг хоёрдмол утгагүйгээр илэрхийлэх явдал чухал юм.