ESIC буюу Цахим спортын шударга байдлын хороо сүүлийн өдрүүдэд ширүүн байна. Энэ бүх үйл явдал "CS2″"-ийн украин тоглогч "Ganginho" буюу Илья Черниченкогоос эхэлсэн гэхэд буруудахгүй. Өнгөрсөн жил зодог тайлсан тэрбээр саяхан өөрийн сошиал хуудаснаа "Зөвхөн тоглохоос гадна өөр аргаар ч мөнгө олох боломжтой" гэх утгатай зүйлсийг бичиж, үнэтэй машин хөлөглөн, бэлэн мөнгө барьсан зургаа нийтлээд удалгүй устгасан юм.

Тэгвэл дээрх үйл явдлаас удалгүй "ESIC"-ийн зүгээс мэдэгдэл гаргаж, "Ganginho"-г өөрийн дансаараа дамжуулан багийнхаа оролцсон тоглолтуудад нийт 390 удаа нийт 20 мянган орчим ам.доллараар мөрий тавьсан нотлох баримтуудыг ил болгожээ. Өөрөөр хэлбэл, "Ganginho" тоглолт наймаалцаж, дундаас нь ашиг олдог байсан аж. "ESIC"-ийн зүгээс түүнд гурван жил хориг тавьжээ. Түүний хувьд "Sangal Esports", "TNL" зэрэг багуудад тоглож байсан түүхтэй.

"Ganginho" өнөөдөр/2025.03.07/ өгсөн ярилцлагадаа "JiJieHao", "500", "Partizan", "ECSTATIC" багуудыг ч тоглолт наймаалцсан байх талтай гэдгийг дурдаад зогсохгүй "r1nkle", "w0nderful" зэрэг тоглогчдыг ч ийм хэрэгт орооцолдсон гэж хардаж байгаагаа хэлжээ.

Нэгэнт ассан гал төсөөлөөгүй байдлаар Монголын "ATOX" багтай холбогдож, "ESIC"-ийн зүгээс тус багийн бүх тэмцээнд оролцох эрхийг түдгэлзүүлээд байна. Улмаар "ATOX" баг Португалд болох "BLAST Open Spring" тэмцээнд оролцох боломжгүй болж, тэднийг Монголын өөр нэгэн баг болох "The HUNS" орлохоор болжээ. Оросын алдарт стриймер "OverDrive"-ийн мэдээлснээр "ESIC"-ийн зүгээс тэдний эсрэг хөдлөшгүй нотлох баримт олсон бөгөөд гуравдугаар сарын 12-ны дотор гэхэд тайлбар өгөхийг хүсчээ. Ерөнхийдөө "ATOX" багт хориг тавьсан гэдгийг гуравдугаар сарын 13-ны өдөр зарлах гэнэ.

"ATOX"-ийг 2024 онд тоглолт наймаалцсан гэх баримт олджээ.

Энэхүү мэдээлэлтэй холбогдуулан "PGL"-ийн зүгээс "PGL Bucharest" тэмцээний Азийн сонгон шалгаруулалтаас "ATOX" багийг хасч буйгаа мэдэгдлээ. Энэ даамжирсаар "ATOX"-ийн Мэйжорт оролцох мөрөөдөл ч үгүй болох шинжтэй.

Цахим спортын ертөнцөд Монголтой холбоотой өөр нэгэн мэдээлэл байгаа нь өчигдөр/2025.03.06/ Н.Учралын танилцуулсан мэдэгдэл. Оросын болон олон улсын цахим спортын форумуудаар тус шийдвэрийг егөөдөн хүлээн авч байна. Саяхан л сайд нь хүлээн авч, үндэсний шигшээ багаа болгосон атлаа тэмцээн уралдаан болон багийг нь ивээн тэтгэж буй байгууллагуудыг сурталчлахыг хориглож байгаа нь хачирхалтай санагдаж байгаа аж.