Өмнөд Солонгос, АНУ-ын шууд буудлагын сургуулилалтын үеэр сөнөөгч онгоцууд санамсаргүйгээр энгийн иргэний байшингуудыг бөмбөгджээ. Үүний улмаас 15 хүн шархдаад буйг Өмнөд Солонгосын арми өнөөдөр /2025.03.06/ мэдээллээ. Найман ширхэг "MK-82" тэсрэх бөмбөгийг хоёр "KF-16" сөнөөгч онгоцноос хаясан нь зориулалтын буудлагын талбайн гадна газарджээ. Зориулалтын талбайд газардаагүй бөмбөгнүүд Сөүлээс зүүн хойд зүгт орших Почеон хотын иргэний дэд бүтэц дээр унасан байна.

Нисгэгч бөмбөгдөлтийн координатыг буруу оруулсанаас болж осол гарсан гэж Өмнөд Солонгосын Батлан ​​хамгаалах яам эхний байдлаар мэдэгджээ.

Шархадсан 15 хүний хоёрынх нь биеийн байдал хүнд байна. Мөн хоёр орон сууцны барилга, сүм, ачааны машин тус тус бөмбөгдөлтөд өртжээ. Ослын газрын байр байдал тулааны талбарыг санагдуулам эмх замбараагүй байгааг Почеон хотын дарга Бэк Ён-хён мэдэгдлээ. Агаарын цэргийн хүчнийхэн энгийн иргэдэд хохирол учруулсандаа уучлал хүсч, хохирлыг барагдуулна гэжээ.

Өмнөд Солонгос болон АНУ-ын жил бүр зохион байгуулдаг "Эрх чөлөөний бамбай" цэргийн сургуулилалттай холбоотой шууд буудлагын үеэр уг осол болжээ. Сургуулилалт гуравдугаар сарын 10-наас 20-ны хооронд болно. Санамсаргүй ослын мөрдөн байцаалтын ажиллагаа дуустал шууд галын сургуулилалтыг түр зогсоогоод байна.