Монгол Улсын Засгийн газрын 2022 оны 376 дугаар тогтоолоор баталсан Допингийн эсрэг үндэсний дүрмийн хүрээнд, Монголын үндэсний бөхийн холбооны захиалгаар 2025 оны хоёрдугаар сарын 24-ний өдрийн "Таравлин" хийдийн нэрэмжит сар шинийн баярт зориулсан сумын цолтон болон залуу бөхчүүдийн барилдааны үеэр "Тэмцээний үеийн" 12 шинжилгээг Монголын үндэсний допингийн эсрэг байгууллага авч ажилласан.

Сумын заан цолтон болон залуу 668 бөхийн барилдаанд зодоглосон бөхчүүдээс сонгож авсан 12 бөхийн шинжилгээний хариу Герман улсын Дрезден хотын допингийн анализ болон спортын биохимийн институт (IDAS)-ээс хоёрдугаар сарын 28-ны өдрийн 19:35 цагт буюу сорьц тээвэрлэсэн нислэгийн хуваариас шалтгаалан дөрвөн хоногийн дотор Монголын үндэсний бөхийн холбоо ба Допингийн эсрэг үндэсний байгуулагад иржээ.