Төв, Сэлэнгэ, Дархан-Уул аймгийн нутаг дэвсгэрт өчигдөр цас орны улмаас автозамуудад халтиргаа гулгаа үүссэн байна. Орон нутгийн автозам арчлалтын компаниуд халтиргаа гулгаа үүссэн автозамд хайрга дайрга асгаж, аюулгүй байдлыг ханган ажиллаж буй аж. Мөн өнөөдөр төв, говь, зүүн аймгуудын нутгийн зарим газраар цас орж, зөөлөн цасан шуурга шуурч, тал, хээрийн нутгаар явган шуурга шуурч зам, даваанд халтиргаа, гулгаа үүсэж болзошгүй аж.

Иргэд, жолооч, тээвэрчид та бүхэн тээврийн хэрэгслийн бүрэн бүтэн байдлыг хангаж, халтиргаа гулгаанаас сэргийлж, хурдаа тохируулан, хамгаалах бүсээ зүүж, гэрлээ шилжүүлэн болзошгүй эрсдэлээс урьдчилан сэргийлэхийг Тээврийн цагдаагийн албанаас анхааруулж байна.