АНУ-ын ерөнхийлөгч Дональд Трамп Украинд үзүүлэх цэргийн тусламжаа түр зогсоов. АНУ-ын хэвлэл мэдээллийн хэрэгслүүд Трампийн засаг захиргааны албан тушаалтнуудаас эш татан мэдээлэхдээ “Украин энх тайвны төлөөх сайн санааны хэлэлцээг тууштай үргэлжлүүлэх хүртэл Трамп бүх тусламжаа түр зогсооно. Ерөнхийлөгч энх тайвны төлөө анхаарлаа хандуулж байгаагаа тодорхой хэлсэн. Түншүүд маань ч гэсэн энэ зорилгодоо тууштай байх хэрэгтэй” гэв.

Олон сая ам.долларын зэвсэг, сумны нийлүүлэлтийг түр зогсоох шийдвэр нь Оросын түрэмгийллийг няцаах Украины хүчин чармайлтад цохилт өгөх бололтой.

Трамп тангараг өргөснөөсөө хойш цэргийн тусламжийн шинэ багц батлаагүй ч ерөнхийлөгч асан Жо Байден ойрын хэдэн жилдээ зэвсэг техник нийлүүлэх шилжүүлгийг баталсан билээ. АНУ-ын Батлан ​​хамгаалах яамны мэдээлснээр, Вашингтоноос Украинд 182.8 тэрбум ам.доллар зарцуулсан ч үүнд Европ дахь АНУ-ын цэргийн сургуулилалт зэрэг аюулгүй байдалтай холбоотой өргөн хэмжээний зардал багтсан байна. Трампийн зарлигаас өмнө АНУ энэ жил сар бүр 920 сая ам.долларын нийлүүлэлт төлөвлөж байжээ.

Өнгөрсөн сард Зеленский ярилцлага өгөхдөө АНУ-ын дэмжлэггүйгээр улс орон нь амьд үлдэх боломж багатай гэж хэлсэн билээ. Сүүлийн үл ойлголцлын дараа ч Зеленский түншүүдтэйгээ үргэлжлүүлэн ажиллах болно гэж мэдэгджээ. Мөн энх тайванд хүрэхийн тулд АНУ-ын дэмжлэгт маш их найдаж байна гэсэн юм.

Тусламжийг түр зогсоосон үйлдлийг Ардчилсан намын хууль тогтоогчид болон Украины дэмжигчид буруушааж байна. АНУ-ын Төлөөлөгчдийн танхимын Ардчилсан намын гишүүн Прамила Жаяпал энэ шийдвэрийг "Америкийн түүхэн дэх хамгийн ичгүүртэй өдөр" гэж нэрлэв. Харин Барак Обамагийн үед ОХУ-д дахь АНУ-ын Элчин сайдаар ажиллаж байсан Майкл Макфол энэ үйлдлийг “эмгэнэлтэй” гэж дүгнэжээ.

Дашрамд дурдахад, Трамп, Зеленский нарын дунд хагарал үүссэн тул Их Британи, Франц тэргүүтэй Европын орнууд энхийн хэлэлцээр байгуулах саналыг судалж байна. Энэ хүрээнд Их Британи, Франц улсууд гал зогсоох тохиолдолд Украинд энхийг сахиулагчдаа илгээхэд бэлэн байгаагаа илэрхийлжээ.