АНУ-ын ерөнхийлөгч Дональд Трамп, Украины ерөнхийлөгч Володимир Зеленский нарын түүхэн уулзалт хоёрдугаар сарын 28-ны Баасан гаригт Цагаан ордны Зууван танхимд болсон. Энэ уулзалтын үеэр Трамп болон дэд ерөнхийлөгч Ж.Д.Вэнс нар Зеленскийг талархал илэрхийлж мэддэггүй гэж шүүмжилсэн билээ. Тэгвэл "CNN" агентлаг "Fact Check" буландаа Зеленский дайн эхэлснээс хойш хэчнээн удаа АНУ-д талархал илэрхийлснийг түүвэрлэн онцолжээ.

Зеленский Баасан гаригт Цагаан ордноос гарсныхаа дараа "Х" хуудсандаа "Баярлалаа Америк. Дэмжсэнд баярлалаа, айлчлалд баярлалаа. АНУ-ын ерөнхийлөгч, Конгресс болон ард түмэнд баярлалаа. Украинд урт удаан үргэлжлэх энх тайван хэрэгтэй. Бид үүний төлөө тууштай ажиллаж байна" гэж жиргэсэн юм.

Тэгвэл өмнө нь Зеленский АНУ болон тус улсын албан тушаалтнууд, ард түмэнд 33 удаа талархал илэрхийлж байсныг доор жагсаав. Энэ нь бүрэн жагсаалт биш бөгөөд украин хэлээр дотооддоо хэлсэн үгс үүнд багтаагүй аж.

2022 оны нэгдүгээр сарын 21-нд "Х" платформд: Украинд урьд өмнө байгаагүй дипломат болон цэргийн тусламж үзүүлсэн АНУ-ын ерөнхийлөгчид баярлалаа.

2022 оны долдугаар сарын 1-нд "Х" платформд: Украинд орчин үеийн агаарын довтолгооноос хамгаалах систем бүхий аюулгүй байдлын тусламжийн шинэ багцыг илгээх АНУ-ын түүхэн шийдвэрийг сайшааж байна. Түрэмгийлэгчийн эсрэг тэмцэлд үргэлжлүүлэн манлайлж, дэмжиж байгаа АНУ-ын ерөнхийлөгчид баярлалаа. Хамтдаа ялалтын төлөө.

2022 оны наймдугаар сарын 19-нд "Х" платформд: АНУ-ын 775 сая ам.долларын цэргийн тусламжийн багцад маш их талархаж байна. Энэ шийдвэрийг гаргасан ерөнхийлөгч танд баярлалаа. Бид түрэмгийлэгчийг ялах нэгэн чухал алхам хийлээ. Украин эрх чөлөөтэй болно.

2022 оны арванхоёрдугаар сарын 21-нд Байдентай уулзахдаа: Ноён ерөнхийлөгч танд маш их баярлалаа. Мэдээж хоёр намын дэмжлэгт баярлалаа. Конгресст баярлалаа. Украины шударга, эгэл жирийн ард түмний зүгээс америкчуудад талархал илэрхийлж байна. Маш их баярлалаа.

2022 оны арванхоёрдугаар сарын 21-нд АНУ-ын Конгресст үг хэлэхдээ: Энэхүү онцгой зул сарын баяраар би та бүхэнд талархал илэрхийлмээр байна. Халуун дулаан уур амьсгалыг эрхэмлэдэг, бусдад ч бас халуун дулаан сэтгэлийг хүсдэг америкчуудад талархаж байна. Ерөнхийлөгч Байден, Сенат болон Төлөөлөгчдийн танхим дахь хоёр намд үнэлж баршгүй тусламж үзүүлсэнд нь талархаж байна. Энэ жил Украиныг дэмжсэн, украинчуудыг хүлээн авч, төрийн далбааг мандуулсан, бидэнд тусалсан танай хотууд болон ард түмэнд баярлалаа. Фронтод байгаа бүх хүмүүст, ялалтыг хүлээж буй хүн бүрт баярлалаа. Санхүүгийн дэмжлэг маш чухал. Баярлалаа, маш их баярлалаа. Бидэнд аль хэдийнэ өгсөн болох шийдвэр гаргахад бэлэн байгаа тэрхүү санхүүгийн тусламжид баярлалаа.

2023 оны есдүгээр сарын 21-нд Байдентай уулзахдаа: Украинчуудад халуун дулаан, хүчтэй үг хэлсэнд баярлалаа. Баярлалаа, талархаж байна. Тантай уулзаж байгаадаа баяртай байна. Урилга илгээсэнд баярлалаа. Бидний байнгын яриа хэлэлцээ нь манай хоёр улс үнэхээр жинхэнэ холбоотон, стратегийн анд нөхөд гэдгийн нотолгоо. Оросын терроризмтой тэмцэхэд чухал тусламж үзүүлсэнд бид маш их талархаж байна.

2023 оны есдүгээр сарын 21-нд Үндэсний архивт үг хэлэхдээ: Өнөөдөр энд эрх чөлөөнд юу тохиолдохыг үл тоох хүн ганц ч байхгүй. Америкт талархдаггүй хүн гэж Украинд байхгүй. Хийх ёстой учраас биш харин зүрх сэтгэл чинь өөр зүйл хийхийг зөвшөөрөөгүй учраас бидэнд тусалсан та бүхэн. Баярлалаа. Энэ бол хүн чанар. Энэ бол биднийг Украин, та бүхнийг Америк болгодог зүйл. Баярлалаа, Америк.

2023 оны арваннэгдүгээр сарын 20-нд "X" платформд: Өнөөдөр зарласан цэргийн тусламжийн шинэ багцын төлөө ерөнхийлөгч Жо Байден, АНУ-ын Конгресс болон нийт Америкийн ард түмэнд талархаж байна.

2023 оны арваннэгдүгээр сарын 23-нд "X" платформд: Бүх украинчуудын нэрийн өмнөөс бүх америкчуудад Талархлын баярын мэнд хүргэе. Америкийн ард түмэн та бүхэнд баярлалаа. Та нарын хэд нь бидний тэмцлийг чин сэтгэлээсээ мэдэрч, Украинд ялалт хүсч байгааг бид мэднэ. Украинд хийсэн хууль бус, үндэслэлгүй халдлагыг та нарын олонх нь зүрхэндээ ойр мэдэрч, та бүхний ч бас үнэт зүйлд халдсантай адил хүлээж авсныг мэднэ. Америкийн дэмжлэг, дэлхийн манлайллын ачаар Украины сая сая хүний амь аврагдсан. Бид та нарт талархаж байна.

2023 оны арванхоёрдугаар сарын 6-нд "X" платформд: Өнөөдөр зарласан цэргийн тусламжийн шинэ багцын төлөө ерөнхийлөгч Жо Байден, Конгресс болон Америкийн ард түмэнд талархаж байна.

2023 оны арванхоёрдугаар сарын 11-нд "X" платформд: Би АНУ-ын батлан ​​​​хамгаалахын компаниудын удирдагчидтай уулзаж, ард түмнээ хамгаалж, газар нутгаа хамгаалахад туслах зэвсэг үйлдвэрлэдэг америк ажилчин бүрт талархаж байгаагаа илэрхийлэв. Тэд Украины төлөө их зүйл хийсэн.

2023 оны арванхоёрдугаар сарын 11-нд Үндэсний батлан ​​хамгаалахын их сургуульд хэлсэн үг: Би Батлан ​​хамгаалахын сайд Ллойд Остинд баярлалаа гэж хэлмээр байна. Асар том хүн, Украины жинхэнэ найз. Танд маш их баярлалаа, энэ хугацаанд биднийг, Украиныг дэмжиж, чөлөөт ертөнцийг хамгаалж байсан таны хувийн удирдлагад баярлалаа. Дарга Чарльз А.Браун таны алсын хараа, дэмжлэгт баярлалаа. Мөн Украины Тэнгисийн цэргийн хүчин, армид үнэлж баршгүй дэмжлэг үзүүлсэн Тэнгисийн цэргийн хүчний нарийн бичгийн дарга Карлос Дел Торо болон армийн нарийн бичгийн дарга Кристина Вормут нарт онцгой талархал илэрхийлье. Маш их баярлалаа. Америк, таны дэмжлэгт баярлалаа.

2023 оны арванхоёрдугаар сарын 12-нд Байдентай хамтарсан хэвлэлийн бага хурал хийхдээ: Би энд байгаадаа баяртай байна. Амьдрал, эрх чөлөөг хамгаалан хамтдаа хүрсэн бүхнээ Украин өндрөөр үнэлж байна. Оросын ямар ч пуужин Америкийн хүчирхэг Патриот системийг давж чадахгүй гэдгийг бид харуулсан. Та бүхэнд маш их баярлалаа.

2024 оны нэгдүгээр сарын 16-нд "X" платформд: Би Энтони Блинкентэй уулзаж, Украиныг дэмжихэд гуйвшгүй дэмжлэг, манлайлал үзүүлсэн АНУ, ерөнхийлөгч Байден, Конгресс болон Америкийн ард түмэнд талархал илэрхийлэв.

2024 оны гуравдугаар сарын 12-нд "X" платформд: Украинд их буу, танк эсэргүүцэх зэвсэг, агаарын довтолгооноос хамгаалах 300 сая ам.долларын цэргийн тусламжийн багц илгээсэн Жо Байден, түүний засаг захиргаа, Конгресс болон Америкийн ард түмэнд талархаж байна.

2024 оны гуравдугаар сарын 20-нд "X" платформд: Өнөөдөр бид Үндэсний аюулгүй байдлын зөвлөх Жэйк Салливаныг хүлээн авч, утга учиртай уулзалт хийлээ. Манай улс, ард түмнийг дэмжиж байгаа АНУ-д талархаж байна. Олон улсын дэг журмыг хамгаалахад Америкийн манлайлал тууштай байх нь амин чухал юм.

2024 оны дөрөвдүгээр сарын 20-нд Телеграм болон "X" дээр: Конгресс Украинд нэмэлт тусламж үзүүлэх тухай хуулийн төслийг баталсны дараа "Баярлалаа, Америк!" гэж жиргэжээ.

2024 оны таввдугаар сарын 24-нд "X" платформд: Жо Байден, АНУ-ын Конгресс болон түүний хоёр нам, мөн Америкийн ард түмэнд цэргийн тусламжийн шинэ багцыг өнөөдөр зарласанд нь талархаж байна.

2024 оны зургадугаар сарын 7-нд Байдентай уулзахдаа: Ноён ерөнхийлөгч танд маш их баярлалаа. Танд, танай удирдлагад чухал дэмжлэг үзүүлсэнд маш их баярлалаа. Та бүхний цэргийн, санхүүгийн, хүмүүнлэгийн дэмжлэгт бүх украинчууд маш их талархаж байна. Мэдээжийн хэрэг, энэ бол маш чухал … Та бүхэн бидэнтэй хамт байх нь маш чухал. Дэлхийн хоёрдугаар дайны үеийнх шиг АНУ бидэнтэй мөр зэрэгцэн зогсоно гэдэгт найдаж байна. Маш их баярлалаа.

2024 оны зургадугаар сарын 13 Байдентай хамтарсан хэвлэлийн бага хурал хийхдээ: Ноён ерөнхийлөгч өө, та бүхэнд баярлалаа. Бидэнд дэмжлэг үзүүлсэн АНУ-ын Конгресст талархаж байна. Хоёр нам, хоёр танхимд баярлалаа. Эрх чөлөөнөөсөө урвадаггүй, биднийг дэмждэг Америк зүрх сэтгэл бүрт баярлалаа.

2024 оны зургадугаар сарын 13-ны өдөр Украинчуудад илгээсэн захидалдаа: Хамгийн чухал нь, АНУ-тай байгуулсан гэрээнд Украиныг дайны үед ч, энхийн үед ч дэмжихийг заасан. Энэ бол урт хугацаатай гэрээ. Бидэнд энх тайвны тухай ижил үзэл баримтлал бий. Баярлалаа, ерөнхийлөгч Байден, хоёр нам, Конгрессын танхимд баярлалаа, Америк, баярлалаа!

2024 оны долдугаар сарын 3-нд "X" платформд: Жо Байден, Конгресс дахь хоёр нам болон Америкийн нийт ард түмэнд өнөөдрийн цэргийн тусламжийн багцад талархаж байна.

2024 оны долдугаар сарын 4-нд "X" платформд: Баярлалаа, Америк. Тусгаар тогтнолын төлөө тэмцэж буй Украины эрэлхэг зүрх бүхэнтэй эв санааны нэгдлээр цохилж буй америк зүрх бүхэнд баярлалаа. АНУ болон бүх америкчуудад хүч чадал, эв нэгдэл, гуйвшгүй итгэл найдварыг хүсье. #Долдугаарсарын4

2024 оны долдугаар сарын 9-ний өдөр: Эрх чөлөөг тууштай хамгаалж, ялалтыг зорьж буй ноён МакКоннелл таныг Украинд айлчилсанд талархаж байна. Энэ бүх алхам биднийг хүчирхэгжүүлэх болно. Украинд нэмэлтээр таван Патриот агаарын довтолгооноос хамгаалах систем болон бусад олон арван системийг өгч буй өнөөдрийн онцгой шийдвэрт Украины ард түмэн талархаж байна.

2024 оны долдугаар сарын 11-нд Байдентай уулзахдаа: Танд болон танай багт талархаж байна. Мэдээжийн хэрэг, Конгресс – хоёр нам, хоёр танхим, мөн бүх америкчуудад Украин, Украины ард түмэнд амин чухал, хүчтэй дэмжлэг үзүүлсэнд нь талархлаа.

2024 оны долдугаар сарын 11-нд "X" дээр: Таван шинэ Патриот систем болон бусад олон арван системээр агаарын довтолгооноос хамгаалах хүчийг бэхжүүлэх шийдвэр гаргасанд ерөнхийлөгч Жо Байденд бид талархаж байна. Энэхүү хүчтэй шийдвэр нь Оросын терроризмтой тэмцэхэд бидэнд тусална.

2024 оны долдугаар сарын 21-нд "X" дээр: Украины эрх чөлөөний төлөөх тэмцлийг гуйвшгүй дэмжсэнд ерөнхийлөгч Байденд талархаж байна. Энэ нь АНУ-ын хоёр намыг хүчтэй дэмжлэг, шүүмжлэлийг хүлээсээр ирсэн. Одоо ч хэвээр. Бид ерөнхийлөгч Байдены удирдлагад үргэлж талархах болно. Түүхэн дэх хамгийн аймшигтай мөчид тэр манай улсыг дэмжиж, Путиныг манай улсыг эзлэхээс урьдчилан сэргийлэхэд тусалсан.

2024 оны есдүгээр сарын 6-нд "X" дээр: Өнөөдөр зарласан аюулгүй байдлын тусламжийн багцын төлөө Жо Байден, Конгресс дахь хоёр нам болон Америкийн ард түмэнд талархаж байна.

2024 оны есдүгээр сарын 22-нд Пенсильвани дахь сумны үйлдвэрт зочлохдоо: Энд 400 хүн ажилладаг гэж хэлсэн. Гэхдээ би энд ирж, баярлалаа гэж хэлэхийг маш их хүсч байсан. Та бүхний ажлын үр дүн сая сая украинчуудыг аварсан. Би маш их талархаж байна. Жирийн украинчуудаас та бүхэнд талархал дамжуулж байна.

2024 оны есдүгээр сарын 26-нд Байдентай уулзахдаа: Ноён ерөнхийлөгч өө, Украиныг, украинчуудыг, бидний итгэл найдварыг хамгаалахад тусалж буй шийдвэр, тууштай дэмжлэг бүхэнд тань баярлалаа. Оросын аймшигт түрэмгийллийн эхний өдрөөс эхлэн Украин, Америк хоёр зэрэгцэн зогсож байгаад бид гүнээ талархаж байна. Та бүхний шийдэмгий байдал биднийг ялахад үнэхээр чухал.

2024 оны арванхоёрдугаар сарын 7-нд "X" дээр: Елисей ордонд ерөнхийлөгч Дональд Трамп, ерөнхийлөгч Эммануэль Макрон нартай гурван талт үр дүнтэй уулзалт хийлээ. Ерөнхийлөгч Трамп урьдын адил шийдэмгий байна. Танд баярлалаа. Энэ чухал уулзалтыг зохион байгуулсан Эммануэльд  бас талархаж байгаагаа илэрхийлье.

2025 оны нэгдүгээр сарын 10-нд "X" дээр: АНУ-ын ерөнхийлөгчтэй ярилцаж, Калифорнид гарсан ой хээрийн түймэр болон хүний ​​амь нас харамсалтайгаар хохирсон явдалд эмгэнэл илэрхийлэв. Мөн Украины тусгаар тогтнолыг гуйвшгүй дэмжиж, олон улсын хамтын нийгэмлэгийг нэгтгэхэд  чухал үүрэг гүйцэтгэсэнд нь АНУ-д талархаж байгаагаа илэрхийлэв.

2025 оны хоёрдугаар сарын 12-нд "X" дээр: АНУ-ын ерөнхийлөгчтэй утга учиртай ярилцлаа. Бид энх тайвныг тогтоох боломжууд, багийн түвшинд хамтран ажиллах, Украины технологийн чадавхи, тэр дундаа нисгэгчгүй онгоц болон бусад дэвшилтэт үйлдвэрүүдийн талаар ярилцсан. Бидний хамтдаа хийж чадах бүхнийг сонирхож байгаа ерөнхийлөгч Трампад талархаж байна.