Украин болон АНУ-ын удирдагчдын маргаанаар өндөрлөсөн уулзалтыг дэлхийн олон орон ажиглаж байлаа. Оросын нэгэн албан тушаалтан уг уулзалтын талаар хэлэхдээ, Укрианы ерөнхийлөгч гахайн хорооны эзэнд алгадууллаа гэж хошигносон бол АНУ-ын шүүмжлэгчид Трампийг Путины бохир ажлыг хийж байна гэж зэмлэв.

Харин Европын холбооны гадаад бодлогын тэргүүн Кажа Каллас уг уулзалтыг ажигласан дүгнэлтээ хэлэхдээ "Чөлөөт ертөнцөд шинэ удирдагч хэрэгтэй нь тодорхой байна" гэж шүүмжилсэн юм.

Тэрбээр өөрийн цахим хуудаснаа "Украин бол Европ! Бид Украины талд байна. Түрэмгийлэгчийн эсрэг тэмцлийг нь үргэлжлүүлэхийн тулд бид Украинд үзүүлэх дэмжлэгээ нэмэгдүүлнэ. Өнөөдөр чөлөөт ертөнцөд шинэ удирдагч хэрэгтэй нь тодорхой боллоо. Энэ сорилтыг даван туулах нь европчууд биднээс хамаарна" гэж нийтэлсэн байна.

Зеленский болон Трампийн уулзалт дэлхий даяар шуугиан дэгдээж, Орос-Украины дайныг зогсоох хүчин чармайлт эргэлзээ төрүүлж эхэлсэн гэж хэлж болно. Трамп уг уулзалтын үеэр Зеленскийг талархаж чаддаггүй гэж зэмлэж, мөн энх тайвныг тогтоохдоо бэлэн биш, АНУ-ын нандигнах Зуувин танхимд улс орныг нь үл хүндэтгэж байна гэж буруутгасан юм. Гэхдээ уг уулзалтын дараа АНУ биш юм аа гэхэд Европын холбоо Зеленскийг дэмжсээр байна гэдгээ илэрхийлж эхэллээ.

Тус холбооны дарга Урсула фон дер Лейен, Антонио Коста нар Зеленскийд хандаж "Чи ганцаараа биш. Хүчтэй, зоригтой байж бүү ай. Шударга, мөнхийн энх тайвны төлөө бид тантай үргэлжлүүлэн хамтран ажиллах болно" гэж мэдэгджээ.

Үүнээс гадна, Оросын албан тушаалтнууд Трамп, Зеленскийн уулзалтыг дооглон, ерөнхийлөгч асан Дмитрий Медведев Зеленскийг "Гахайн хорооны эзэнд зохих ёсоор чанга алгадууллаа" гэсэн байна. Мөн тус улсын Аюулгүйн зөвлөлийн дэд дарга Медведев Цагаан ордны мөргөлдөөний талаар "Зууван танхимд харгис хэрцгий нөмөрч байна" гэж цахим хуудаснаа нийтэлжээ.

Гадаад хэргийн яамны хэвлэлийн төлөөлөгч Мария Захарова "Трамп, дэд ерөнхийлөгч Ж.Д.Вэнс нар Зеленскийг зодохгүйг хичээж байсан нь гайхамшиг" гэж мэдэгдсэн байна.

Трамп болон Путин хоёрын хамгийн ойрын түншүүдийн нэг Унгарын ерөнхий сайд Виктор Орбан “энх тайвны төлөө зоригтой зогссон” Трампад талархал илэрхийлэв. Орбан олон нийтийн сүлжээнд "Хүчтэй хүмүүс эвлэрдэг, сул хүмүүс дайн хийдэг" гэж бичжээ. Харин АНУ-ын Ардчилсан намын сенатын гишүүд Трамп, Вэнс нарыг Путинтэй талцсан гэж буруутгав. Ардчилсан намын дарга Чак Шумер олон нийтийн сүлжээнд "Трамп, Вэнс нар Путины бохир ажлыг хийж байна" гэж буруутгасан юм.

Түүнчлэн, Канад, Германы удирдлагууд Зеленскийг өмөөрч, Трампийг ширүүн авиртай гэж буруутгасан байна.

Канадын ерөнхий сайд Жастин Трюдо хэлэхдээ, "Украины Оросын эсрэг тэмцэл нь ардчиллыг хамгаалах явдал бөгөөд бид бүгдэд нь хамаатай. Орос хууль бусаар, үндэслэлгүйгээр Украинд довтолсон. Одоогоос гурван жилийн турш украинчууд зоригтой, тэсвэр хатуужилтайгаар тэмцэж байна. Тэдний ардчилал, эрх чөлөө, бүрэн эрхт байдлын төлөөх тэмцэл нь бид бүгдийн хувьд чухал тэмцэл юм" гэж бичжээ. Германы дараагийн канцлер Фридрих Мерц, Францын ерөнхийлөгч Эмманиуль Макрон мөн адил Трюдотой санал нэг байгаа юм.

Харин уг уулзалтыг ажиглаж байсан цахим хэрэглэгчид Трампийг буруутгаж байна. Тэдний нэг Олександра Поворокник өөрийн цахим хуудаснаа, "Зеленскийн яриаг таслах гэж хичээсэн арчаагүй дээрэлхэгчид. Өнөөдөр түүхэн өдөр боллоо. Дэлхийн нийтээр дайнаас болж эх орноо алдах гэж буй эрэгтэй хэрхэн хоёр дээрэмчний эсрэг босч байгааг харлаа" гэж шүүмжилсэн байна. Мөн Любовь Цыбулска гэх эмэгтэй "АНУ-ын ерөнхийлөгч ингэж ярьж байгааг хамгийн аймшигтай хар дарсан зүүдэндээ ч үзэхгүй. Энэ нь санаатайгаар доромжилж, отож байгаа мэт санагдлаа" гэсэн бол нэрт идэвхтэн Сергий Стерненко олон нийтийн сүлжээгээр "Ерөнхийлөгчийг дарамт шахалттай тэмцсэнд нь би хүндэтгэж байна. Бидний улс орон бөхийж, худалддаг улс биш!" гэж мэдэгджээ.