Хятадын ерөнхийлөгч Ши Жиньпин Баасан гаригт /2025.02.28/ Бээжин хотноо Оросын Аюулгүй байдлын зөвлөлийн нарийн бичгийн дарга Сергей Шойгутай уулзсан байна. Энэхүү айлчлал нь тус хоёр орны стратегийн харилцан итгэлцэлийн өндөр түвшнийг харуулж байгаа бөгөөд дэлхийн стратегийн тогтвортой байдалд, ялангуяа геополитикийн ээдрээтэй нөхцөл байдалд чухал ач холбогдолтой гэж шинжээчид үзэж байна. Синьхуа агентлагийн мэдээлснээр, Хятад  болон Орос улс нь найрсаг харилцаатай хөрш орон бөгөөд жинхэнэ найз нөхөд гэдгийг Ши Жиньпин онцлон тэмдэглэсэн байна.

Мөн энэ онд ерөнхийлөгч Владимир Путинтэй хоёр удаа уулзаж, Хятад, Оросын харилцааг хөгжүүлэх ерөнхий төлөвлөгөө гаргаж, олон улсын болон бүс нутгийн томоохон асуудлаар гүнзгий санал солилцсон гэдгээ хэлсэн байна.

Шойгу ерөнхийлөгч Путины чин сэтгэлийн мэндчилгээг Ши Жиньпин даргад уламжилж хэлэхдээ, ерөнхийлөгч Путин Ши Жиньпин даргатай чин сэтгэлийн найрамдал, дотно харилцаатай байгааг өндрөөр үнэлдэг гэсэн байна. Синьхуа агентлагийн мэдээлснээр, Орос, Хятадын харилцаа урьд өмнө байгаагүй өндөр түвшинд хүрсэн бөгөөд гуравдагч этгээдэд чиглээгүй гэж Шойгу мөн хэлэв.

Хятадын гадаад хэргийн сайд Ван И эл өдөр мөн Шойгутай стратегийн яриа хэлэлцээ хийв. Хоёр орны төрийн тэргүүний стратегийн удирдлага дор Хятад, Оросын харилцаа бат бөх, хөдөлшгүй хэвээр байх болно гэж Ван хэлэлцээгээ онцлон тэмдэглэв.

Хятадын Гадаад хэргийн яамны хэвлэлийн төлөөлөгч Лин Жянь энэ талаар орон нутгийн сэтгүүлчдэд хэлэхдээ, шинэ эриний иж бүрэн стратегийн хамтын ажиллагааны түншийн хувьд Хятад Орос хоёр өндөр дээд хэмжээний нягт харилцаа холбоогоо хадгалсаар байна гэжээ. Мөн Шойгугийн айлчлал нь Хятад, Оросын харилцааг хөгжүүлэх стратегийн харилцан итгэлцэл, ил тод байдлын өндөр түвшнийг харуулж байна. Украины хямралын тодорхой бус байдал, түүнчлэн АНУ-Оросын харилцаа, АНУ-Европын харилцаа, Украин-АНУ-ын харилцаа зэрэг геополитикийн нөхцөл байдалд томоохон өөрчлөлт гарсантай холбогдуулан Шойгугийн айлчлал нь Хятад, Орос хоёр орны харилцаа, хамтын ажиллагааны стратегийн уялдаа холбоог цаашид бэхжүүлэхийн тулд хийсэн бодит арга хэмжээ юм гэж Лин тайлбарлажээ.

Истанбул дахь АНУ-ын Ерөнхий консулын газарт АНУ, Оросын төлөөлөгчид хоёр талын асуудлаар зургаан цаг үргэлжилсэн уулзалтаас нэг өдрийн дараа Шойгугийн айлчлал болсон юм. Түүнчлэн түүнийг айлчлах талаар хэвлэлийнхэнд төдийгүй олон нийтэд мэдэгдэл хийгээгүй байсан.

Синьхуа агентлагийн мэдээлснээр, Шойгу Орос-Америкийн харилцааны сүүлийн үеийн байдал, Оросын байр суурийг хэрхэн харгалзан үзэж байгаа талаар Ванд танилцуулж, Орос улс Украины хямралын үндсэн шалтгааныг арилгах, мөнхийн, шударга, тогтвортой энхийн шийдлийг эрэлхийлэх эрмэлзэлтэй байна гэжээ.