Гадаад оюутнууд: Цагаан сарын бэлгэнд мөнгө, оймс авдаг

Монголд суралцаж буй гадаад оюутнууд цагаан сарын баярын талаарх сэтгэгдлийг хүргэе.

Монголд суралцаж буй халимаг оюутан Алдар Дольгана:

-Манай Халимагт цагаан сарын баяр тэмдэглэдэг. Гэхдээ нэг их ач холбогдол өгдөггүй. Хаврын баяр гэдэг утгаар тэмдэглэнэ. Бид ах дүү хамаатан садныдаа зочилж, боорцог бэлэглэдэг. Манай ёс заншил адилхан байдаг. Монголчууд цагаан сарын баяраа уламжлалт баяр гэдэг утгаар өргөн дэлгэр тэмдэглэдэг. Би монгол айлд зочилж, гоё оймс, мөнгөн бэлэг авсан. Монгол хоолноос цуйван гоё амттай.

Монголд суралцаж буй Алтайн оюутан Эркей Чендыев:

-Монгол айлд зочилж бэлэг авдаг бол алтайчууд айлд зочлохдоо бэлэг өгдөг ёстой. Тэр нь маш сонин санагдсан. Монгол түмэн маань цагаан сараа сайхан тэмдэглэж, шинэлэхийг хүсье.

Монголд суралцаж буй буриад оюутан Владислав Самбуев:

-Буриад зон цагаан сарын өмнө бурхан номын хурал хийж, талхаар биеэ цэвэрлээд орой нь шатаадаг. Тэгээд битүүний өдөр буюу бүтэн өдөр нь гэр бүлээрээ бууз жигнэж, мах чанаж иддэг. Мөн талх шиг чихэртэй амттан, боорцог хийж иддэг.