"Иргэд золголт хийхдээ машинаа зөв байрлуулахыг хүсье"

Сар шинийн өдрүүдэд улсын хэмжээнд авто эргүүлийн чиглэлээр 140 чиглэлд 780 албан хаагч ажиллахаас Улаанбаатар хотод 100 чиглэлд авто эргүүлийн үүрэг гүйцэтгэнэ. Ингэхдээ үндсэн хуваарьт томилгоотой алба хаагчдаас гадна 5416 алба хаагч нэмэлтээр ажиллаж, иргэд олон нийтийн аюулгүй байдлын хангана.

Энэ талаар ТЦА-ны Урьдчилан сэргийлэх хэлтсийн ахлах мэргэжилтэн Г.Отгонтамир мэдээлэл өгөхдөө "Өнгөрсөн жилийн цагаан сарын баярын өдрүүдэд нийслэлд зам тээврийн улмаас хүний амь нас эрсдээгүй. Харин орон нутгийн зам хүний амь нас эрсэдсэн хоёр харамсалтай тохиолдол бүртгэгдсэн. Үүний нэг нь бага насны хүүхэд байсан. Сар шинийн баярын өдрүүдэд иргэд хөдөө орон нутаг руу аав ээж, ах дүү, хамаатан садантайгаа золголт хийхээр замын хөдөлгөөн эрс нэмэгддэг. Энэ тохиолдолд зам орчимдоо хурдаа зөв тохируулж явах, хурдыг зөвшөөрөгдсөн хэмжээнээс хэтрүүлэхгүй байх, хоёрт, гүйцэж түрүүлэх үйлдлийг хориглосон нөхцөлд хийсний улмаас мөргөлдөх хэлбэрийн осол аваар бүртгэгдэж байна. Тэгэхээр хол замд зорчиж байгаа иргэд маань хүн тээврийн норм битгий хэтрүүлээч ээ. Тэр тусмаа эцэг эхчүүд хүүхдээ өвөр дээрээ авч, хамаатан саднаа зорчигч хэлбэрээр тээвэрлэдэг. Хүн тээврийн норм хэтрүүлж, осол аваар гарлаа гэхэд бага насны амь нас, эрүүл мэнд эрсдэлд учирдаг. Тиймээс орон нутгийн замаар зорчих иргэд аажуу тайван явахыг зөвлөж байна. Нийслэл Улаанбаатар хотын зургаан товчоогоор хөдөө орон нутаг руу зорчих хөдөлгөөн шинийн 1-нээс нэмэгддэг. Өнгөрсөн 2024 онд 200 мянган тээврийн хэрэгсэл хотоос гарсан гэх статистик бий. Энэ жилийн хувьд баяр амралтын өдөр нэмэгдсэнтэй холбоотойгоор орон нутаг руу зорчих хөдөлгөөн нэмэгдэх хандлагатай байна.

2024 оны сар шинийн баярын өдрүүдэд согтуугаар тээврийн хэрэгсэл жолоодсон 127 зөрчил бүртгэгдсэн.

Иргэд баярын өдрүүдэд ганц хундага архи уусны араас бууз хоол идээд шингэнэ гэдэг өрөөсгөл ойлголтоор зочдоо согтууруулах ундаагаар шахдаг хандлага бий. Үүний цаана эрсдэл байдаг юм шүү. Тиймээс архи согтууруулах ундааг зөв зохистой хэрэглэж, хэрвээ архи уусан бол жолооны ард битгий суугаарай. Мөн архи уусан иргэд жолоодох эрхийн үнэмлэхгүй хүн буюу хүүхдэдээ тээврийн хэрэгслийн жолоог шилжүүлдэг. Тэр тусмаа орон нутгийн замд цагдаагийн хяналт шалгалт бага гэж жолоогоо хүүхдэд шилжүүлэх тохиолдол гардаг. Эдгээр зүйлийг онцгойлон анхаарахыг зөвлөж байна.

Хоёрт, сар шинийн баяраар гэр хороолол руу чиглэсэн хөдөлгөөн эрс нэмэгддэг. Цагдаагийн байгууллагаас хүн хүчээ тэнцүү хуваарилж, гэр хороолол руу чиглүүлсэн. Цагдаагийн алба хаагчид бүрэн бүрэлдэхүүнээрээ ажиллана. Хамгийн гол нь иргэд гудамж, зам талбайд тээврийн хэрэгслээ зогсоохдоо эмх замбараатай байршуулж, хөдөлгөөн хаахгүй байхыг хүсье. Цагдаа, онцгой, түргэн тусламжийн машинд гарц гаргаж, зам тавьж өгөхийг уриалъя" гэв.