Хойд Солонгосын удирдагч Ким Жон Ун стратегийн далавчит пуужингийн туршилтыг хянаж, цөмийн довтолгооны хүчин чадлыг ашиглахад бэлэн байхыг тушаасан байна. Энэ нь улс орны аюулгүй байдлыг хангах болно гэж тэрбээр хэлсэн талаар тус улсын хэвлэлүүд онцолжээ.

Ким Жон Уны мэдэгдсэнээр, энэхүү туршилт нь улс орны аюулгүй байдлыг ноцтойгоор зөрчиж, сөргөлдөөний орчныг нэмэгдүүлж, хурцатгаж буй дайснууддаа сэрэмжлүүлэх зорилготой юм. Мөн янз бүрийн цөмийн зэвсгийн ажиллагаа явуулахад бэлэн байгаа гэдгээ харуулах зорилготой байжээ. Орон нутгийн "KCNA" агентлагийн иш татсанаар, "Хүчирхэг цохилт өгөх чадвар нь хамгийн төгс урьдчилан сэргийлэх, хамгаалах чадвар юм. Хойд Солонгосын цөмийн зэвсэгт хүчний хариуцлагатай эрхэм зорилго, үүрэг бол цөмийн зэвсгийг байлдааны бэлэн байдалд бүрэн бэлтгэж, цөмийн зэвсгийн найдвартай бамбайгаар үндэсний бүрэн эрхт байдал, аюулгүй байдлыг үргэлж хамгаалах явдал юм" гэж мэдэгдсэн байна.

Пуужинг Солонгосын хойгийн баруун эргээс холгүй далайн дээгүүр Лхагва гаригт хөөргөсөн гэж мэдэгджээ. Энэхүү пуужингийн төрөл нь НҮБ-ын Аюулгүйн Зөвлөлийн тогтоолоор албан ёсоор хориглоогүй тул баллистик пуужинтай харьцуулахад олон улсын хамтын нийгэмлэгийн түгшүүр, зэмлэл бага байдаг.